No.602/2020-2021


Nimin April 24, 2020 (Zirtawpni) khan Manpower Development Board Vice Chairman leh Aizawl West-I Bialtu MLA ni bawk, Pu Zothantluanga chuan a bial chhunga damdawi In pahnih, Seventhday Hospital, 7th Day tlang, Vaivakawn leh Ebebezer Hospital, Chawnpui te a tlawh bakah, Civil Hospital, Aizawl-te tlawhin, heng damdawi In a hman atan hian hmai tuamna (Mask) leh Kutkawr (Glove) engemaw zat a sem.

Covid-19 avanga harsatna hrang hrang thleng mekah Damdawi In lama thawktute tan pawh Hmui tuamna (Mask) lei tur a harsa em em a. He harsatna hi hriain Aizawl West-I Bialtu MLA Pu Zothantluanga chuan Hmai tuamna (Mask) puan than engemaw zat leiin, Zotlang venga puanṭhui thiam ten a ṭhui man pakhat mah la lovin tlawmngaih chhuahin an ṭhui ve thung a. Heng an mask ṭhui sa engemaw zat hi Aizawl West-I Bial huam chhunga veng hrang hrangah sem chhuah a nih tawh hnuah, vawiin lam khan Damdawi In hmun hrang hrangah Aizawl West-I Bialtu MLA hian a sem chhuak leh a ni.

Seventh Day hospital, Vaivakawn-ah hian an Director Dr. Larinpuii leh thawktu dangten  Aizawl West-I Bialtu MLA hi lo dawngsawngin, MLA hian Seventhday Hospital tan hian Hmui tuamna (Mask) 300 leh Kutkawr (Glove) 200 a hlan a. Hemi hun hian, Ebenezer Hospital, Chawnpui a mi chu Pu Zothantluanga chuan tlawh lehin Hmui tuamna (mask) 300 a pe leh bawk. Ebenezer Hospital Hospital-ah hian Hospital Director Dr. Vanlalsiama leh thawktu dang ten MLA hi an lo dawngsawng a ni.

Aizawl West-I Bialtu MLA Pu Zothantluanga hian Civil Hospital, Aizawl pawh tlawh lehin, Civil Hospital ten an mamawh em em Hmai tuamna (Mask) 500 chu Civil Hospital-a damlo leh thawktu dangte hman atan Nursing Superintendent, Pi Lalrinthangi Pachuau hnenah a hlan leh bawk a ni. 

Nimin chawhnu vek khan Aizawl West-I Bialtu MLA chuan a bial chhunga awm Mizoram University chu tlawh lehin, India ram hmun hrang hrang atanga lo kal University-a tang khang mek te leh University-a cheng mekte tan hian Buhfai Bag 3, Alu bag 1, Dal Bag 1, Purunsen Bag chanve, Tel case 1 leh Silpauline a hlan leh bawk a ni. Pu Zothantluanga chuan April ni 23, 2020 (Ningani) pawh khan a bial chhung Sihhmui khuaa awm ‘Bethani Children Home’ chu a lo tlawh tawh bawk a; Home-a awm thawktu mi 11 leh hnuchham enkawl lai mi 17 te eitur Buhfai Bag 3, Alu Bag, dal Bag 1, Purunsen bag 1, Tel case 1 leh Artui Case 1 a lo hlan tawh bawk a ni.

Attachment

  • Loading attachment...