Vawiin atanga tan tun ni 5 chhung awh Rural Development Department hnuaia Senior & Junior Officers te puala ‘Management Development Programme’ tih thupui hmanga National Institute of Rural Development & Panchayati Raj, Guwahati ten training an rawn buatsaih chu Pi Maria C.T Zuali, Director, SIRD, Mizoram chuan DRDA Conference Hall, Aizawl ah vawiin chawhma dar 10:00 AM khan a hawng.

Pi Maria-i chuan thu sawiin, ‘management subject hi thil har tak a ni a, a bik takin human management hi thil har a ni’ a ti a, trainees te chu hre sathliah lova, thiam a, an hnathawh kawngah hmang tangkai turin a chah a ni.

He training Course Director hi Dr. R.M Pant, Director, NIRD-NERC, Guwahati a mi niin, Pi Golda Dell Zohmangaihi, Faculty, ATI, Aizawl, Prof. E. Nixon, Prof. L.S Sharma leh Prof. Laldinliana, Mizoram University, Commerce Department bakah Dr. M.K Shivastava, NIRD-NERC, Guwahati ten zirtirna an pe dawn a.

He training ah hian SIRD Faculty te, DRDA APO, MZSRLM leh ETC Faculty mi 21 an tel a, Trainees te hian Classroom teaching & practical ni 4 an neih dawn bakah Ni khat hi Mizoram sorkarin Development Programme a kalpui tawhna an en ho dawn a ni.