336/2023-2024
05.05.2023: Chief Minister Pu Zoramthanga chuan Manipur a thilthleng mek chungchangah Mizoram atanga tangkhang awm mekte hruai haw na tur hma lak a nih thu a sawi :
Manipur state a buaina awm chungchang thuah Manipur a awmte chauh nilo in thenawm ram State zawng zawng a awm te, Mizoram atanga awmte, Manipur chhunga chengte zawng zawngin harsatna nemen lo an tawk a. Chumi chu buaipuiin Mizoram sawrkar pawhin, a bik takin Mizoram atanga Manipur a awmte harsatna sukiang turin theihtawpin hma kan la a.
Union Home Minister Pu Amit Shah te, Manipur Chief Minister Pu Biren Singh te nen inbiain, official level ah pawh nasa takin tunah hma kan la mek a. Tin an himna turin vawi tam inbia in hma kan la bawk a. Chutih laia kan tum chu zirlaite leh a bik takin Imphal a tangkhang laklawhte an lo chhuah theihna turin thlawhna pawh charter a Imphal atanga han lachhuak turin tunah kan bei mek a, tih thuai pawh kan tum a ni.
Hemi thuah hian pawi kan tih em em chu hetianga buaina a lo chhuah tak na hi a ni a. Dawhkana thil sawifel theih ni sela tha tur a ni a. Chutiang nilo a mipui leh mipui inkarah buaina a lo chhuah takah si chuan hemi chingfel tur hian Manipur sorkar leh central sorkar pawh hian chak taka hma an lak kan duh a. Hetiang buaina hi a kal zel tha kan ti lo.
He buaina avang hian a bik takin Mizoram dep a tlang mi te, Churachandpur leh a chhehvela mi ten harsatna chi hrang hrang tawkin ei leh bar kawngah supply hmuhna tur buhfai a ni emaw, oil lam a ni emaw, thildang a ni emaw harsatna an tawk palh ang tih kan hlau em em a. Chutiang harsatna chu an tawk palh a nih phawt chuan kan theihtawpin Mizoram atangin lo ngaihtuahpui a, an lakluh theihna tur lo ngaihven sak kan inpeih a ni.
Tlang mipui, kan zohnahthlak unaute kan theihtawpa an harsatna tinreng hi buaipui a, sutpui a, a theih ang zela champion pui zel pawh kan tum a. Manipur lama kan unau te pawh heng hi dawhkana chinfel theih kan duh ber a. Amaherawhchu harsatna chi hrang hrang an tawh chuan theih ang tawkin kei leh ka sawrkar te hian puih zel kan tum a ni.
Tangkhang ten Aizawl an lo thlen ngei theihna turin hma kan la a. Imphal lama kan Mizo hnahthlak tangkhangte pawh Churachandpur leh a chhevel, an chenna hmun him taka an thlen theihna turin Manipur Chief Minister nasa takin ka nawr a. "Ka lo ti ngei ang e" a ti bawk a, chumi tur chuan tlangmite tan harsatna politics ah emaw, rahbehna awm lova a kal ngei theihna turin keini pawhin theihtawp kan chhuah dawn a ni.
