No.235/2021-2022

Aizawl the 23rd April, 2021 : Nimin Dt. 22.04.2021 khan Manpower Development Board Vice Chairman leh Aizawl West-I MLA ni bawk Pu Zothantluanga chuan a bial chhung Chawlhhnun veng a Co-operative Building, a MLA fund atanga Cheng nuai 4 vel senga Covid Care Centre atan a thuam that chu tlawhin, an mamawh tur thil chi hrang hrang pek bakah, hmalak chhunzawmna tur thilah thuneitute a biak sak nghal hlawm bawk.

Pu Zothantluanga hian nimin vek khan Covid-19 hri leng thawh hnihna thleng leh mek chungchangah a bial chhunga veng/khua hrang hrang te dinhmun thlirin, veng/khaw tin Local/Village Task Force Duty a tlawh kual bawk nghal a. A bial chhunga veng hrang hrang Task Force tinah hian a tul ang zela an lo hman atan Rs. 10,000/- theuh a pek bakah, Hand Sanitiser, Glove leh Hri thahna hlo te a sem vek hlawm a ni.

Pu Zothantluanga hian a bial chhung a tlawh kualnaah hian a bial mipui te hnenah hian, Covid-19 hrileng vanga Sorkar-in mipui te zawm tur dan an siam te tha taka zawm turin leh, dan kengkawhtu Police leh Task Force te thu awih thiam tura a chah a. Pu Zothantluanga hian a bial mipuite chu thlamuanin Covid-19 hri leng chhungin kan bial chhungah tumah eitur neih loh avanga harsatna tawk an awm kan remti lova. Chutianga harsatna tawk kan awm a nih chuan kan khawtlang hruaitu hnenah inhriattir zel ni se, kan khawtlang hruaitute hian hma kan lo la nghal zel ang tiin ngenna a siam zel nghal bawk a ni.