Chief Minister Pu Lal Thanhawla chuan martyr te inpekna hi a hlu a theihnghilh chi an nilo a ti. He thu vawiina Mizoram Martyr Family Association (MMFA) General Assembly Vawi 2-na Vanapa Halla a hmanpuina a a sawi a ni.

Chief Minister chuan kan ramin beisei neiin zalenna kan sual a, a hlawhtling emaw hlawhtlinglo emaw kan thalai ten an thisen dahkhamin an nunna an hlan a; an inpekna hi a hlu a theihnghilh chi an nilo a ti a. An thil tih hlutna ah an chiang a, a zahawm hle a ni tiin, chumi chu chawi nunga MMFA in an kalpui hi a ropui hle a ni a ti.

Chief Minister chuan Mizoram buaina kha politics a buaina a ni a, silaia chinfel theih a nilova politics veka chinfel chi a nih avangin, kum 1984 a thlan tlin kan nih khan India sorkar leh MNF inkara inremna a awm theih dawn phawt chuan lal thutthleng kan ken phal thu kan sawi ani a ti a. Central Minister pakhat phei chuan hel hnena lal thutthleng pek chu ram hmelma nihna anih thu min hrilh nghe nghe a ni Pu Hawla chuan a ti a. Kum 1986 a Remna leh Muanna Mizoramin alo neih khan kuthnathawktu loneimi leh eizawnna a rahbi tleute tan eizawnna ngelnghet an neih theihna turin NLUP kalpuiin tam takin an hlawhtlinpui a ni a ti a. Tunah hian NLUP changtlung zawk kalpui mek anih thu sawi bawkin, thalaite tan khawvel thar infiamna lamah leh zirna lamah chak taka kalpui a ni a ti a. Mizote min tichhetu corruption pawh a zung nen lam phawia, phoro turin phak tawk leh theih chinah chak taka kalpui a ni a ti.

MMFA hi kum 2009 April ni 4 khan Mizoram buai kaihhnawiha nunna chante zawng zawng huapa din a ni a. Tunah hian chhungkua 2057 awmin, office bearer 11 leh executive member 30 an awm mek bawk a ni.

MMFA General Assemblyah hian resolution pathum an passed a. Chungte chu Mizoram buai hun chhung March ni 1, 1966 leh 30th June 1986 inkara martyr chhung ten central sorkarah ex-gratia mi pakhat tan Rs.1 lakh an dil mek hi Lal Thanhawla sorkar hian tih hlawhtlin sak te, MMFA member te tan an phak ang zela sorkar hna leh chhawmdawlna ngaihtuah sak te leh Chief Minister Pu Lal Thanhawla’n martyrte chhungte a enkawlna leh chhawmdawlna ah lawmthu sawiin, mirethei te leh chanhaite tanpuitu anihna te an chhuan thu tarlangin, theihtawp chhuaha puih let ve an bat tlat thu te a tel a ni.

Assembly ah hian district tin atangin palai engemawzah an kal a, inkhawm hi an President Pu K.Pakunga’n a kaihruai a ni.