Nimin khan Parliamentary Secretary Pu Joseph Lalhimpuia chuan leilung hausakna laih chhuah tuma hma lak mekna Oil India Ltd. hmun, Maubuang-ah a tlawh a, Parliamentary Secretary hi Pu H. Lalbiakkima, Geologist Senior, DG&MR, leh Oil India Ltd. atangin Pu C.Laldinkima, Senior Geologist, Pu Amita Bordoloi, Senior Geologist, Pu Bidyut Jyoticheleng, DIC, Drilling leh Pu Surajit Das, Senior Chemist ten an tawiawm.

Parliamentary Secretary chuan lei verh hna hi nakin zela Mizoram mipuite tana chhenfakawm leh rotling tur a nih avangin hna hi chak tak leh tha taka kalpui a tul thu a sawi a, an hnahthawh pawh en leh vil zui zel a pawimawh thu a sawi bawk.

Lei verh hna hi chhun leh zan zawma thawh a ni a, a thawktute hian hunbi neia inthlak kualin hna an thawk. Tunah hian 17.5 inch hawlh tlanga zauin 230 meters a thuk verh a ni tawh a, chu chu khawl hmangin a leilung inthuahthip dan en dik vek tawh a ni. He 230 meters-a thuk verh tawh hi 26inches hawlh tlanga zauva tih len leh mek a ni a, 86 meters a thuk zauh thlak a ni leh tawh.

Lei verhna ekchhia sawngbawlna/sawngbawldan mumal taka kalpui a ni a. Lei verh nana an hman chirhdiak (bentonite clay) pawh thlitfima hman nawn leh zel a  ni. Chirhdiak (bentonite clay) ah hian chemical hlauhawm engmah hman a ni lo niin Oil India Ltd. hotute chuan an sawi.

He lei verhna hmunah hian Mizo thalai 30 dawn lai rawih mek an ni.