271/2022-2023
Aizawl 25th April 2022: Vawiin khan LAD Minister Pu K Lalrinliana chuan Maubuangah Panchayat Bhavan hawnna leh Maubuang khuain National Panchayat Award 2021 “Deen Dayal Upadhyay Panchayat Sashaktikaran Puraskar” an dawn lawmna programme-ah khuallian a ni a.  He program hi Aizawl South III bialtu MLA Prof F Lalnunmawia pawhin a hmanpui a ni.

LAD Minister Pu K Lalrinliana chuan Mizorama VC hnathawk tha leh entawntlak zingah Maubuang VC te an tel a; an khua chu faina kawngah te, fire prevention lamah te thlengin entawntlak niin lawmman pawh an lo dawng tawh thin, a ti a. National Panchayat Award kum hnih a zawna an dawng thei chu lawmawm a tih thu leh chhuanawm

a tih thu a sawi a ni. Sawrkar atanga sum leh pai an dawn te a nih dan tur dik takin, rinawm taka khawtlang hmasawnna atana hman a pawimawh a; Maubuang VC ten khaw dangte tana entawntlak khawpa hna an thawk chu lawmawm a tih thu leh midangte tan entlawk ni chhunzawm zel tura a duhsak thu LAD Minister chuan a sawi. Minister Pu K Lalrinliana chuan Mizoram ramri buai laia mipui nitin mamawh lakluh harsat dan leh chumi paltlang tura Pathian kaihhruaina an dawn dan he hunah hian a sawi a. Thlaiah Mizoram kan intodelh viau laiin buhfaiah vawiin thlengin kan intodelh thei lo a, oil leh gas pawh state pawn atanga phurh luh ngai a ni; Pathian khawngaihna a zarah vawiin thlengin mipuite hman tur tlachham loa kan mamawh kan nei thei zel hi a lawmawm hle a ni, a ti. Mizoram Sawrkar hmalakna pui ber SEDP chungchang pawh sawiin hma lak mek a nih dan leh COVID19 hripui avanga harsatna an tawk chunga hmalak chhunzawm a nih dan a Pu K Lalrinliana chuan a sawi lang bawk.

Pu K Lalrinliana chuan Sawrkarin Maubuang khaw tan Common Service Centre (CSC)a pe dawn tih vawiin program-ah hian a puang a. CSC pakhat din man hi cheng nuai 4 hu vel niin bungrua nuai 3 man bakah civil works nuai khat man a keng tel dawn a ni.

Aizawl South III bialtu MLA Prof F Lalnunmawia chuan Maubuang VC te leh mipuite tanrualna avanga national award an dawng thei leh Panchayat Bhavan tha tak an nei thei chu a lawmpui tak zet thu a sawi a. He khua hian sawrkar department hrang hrang hnuaiah tanpuina an hmu thin a, hmasawnna hna chi hrang hrang thawh niin a khaw mite leh khawtlang hruaituten tangkai takin an hmang thin, a ti a. Hmasawnna kawng hrang hrangah midangte tihhmuhtu ni zel turin bialtu MLA Prof F Lalnunmawia chuan duhsakna a hlan a ni.

India zalenna kum 75-na lawmna kal zel Azadi ka Amrit Mahotsav hnuaiah localisation of Sustainable Development Goals theme 9 Sawrkar Laipui chuan a ruahman a. Sawrkar Laipui duh dan angin Mizoramah chuan heng SDG 9 zinga pathum child friendly village, healthy village leh clean & green village te hi kalpui turin VC pathum thlanchhuah a ni a. Clean & Green Village ah hian Maubuang pawh a tel a ni. Maubuang hian National Panchayat Award chu Sanitation (faina)-ah an tihthat vangin an dawng a. An khua hi pawna inthiar awm lohna ODF (open defecation free) mai ni loin hmarchhak state-a khaw hrang hrang zingah ODF plus-a puan hmasak ber an ni. Bawlhhlawh sawngbawl kawngah an titha hle a, plastic collection centre pawh an siam a. Faina inelnaah hian a kum zawnin lawmman an la tawh a ni. Nimin maia National Panchayat Day lawmna inkhawm India Prime Minister Pu Narendra Modi hova Palli, Samba, Jammu &Kashmir a buatsaihah Maubuang khua vek hian Sanitation Theme-ah Mizoram atangin National Panchayat Award 2022 “Deen Dayal Upadhyay Panchayat Sashaktikaran Puraskar” an dawng leh bawk a, heti hian kum hnih a zawnin he award hi an dawng ta a ni.

LAD Minister Pu K Lalrinliana hawn tak Panchayat Bhawan hi Mizoramah chuan VC House tia hriat a ni a. Ministry of Panchayati Raj hnuaia Rashtriya Gram Swaraj Abhiyan (RGSA) fund cheng nuai 20 senga sak a ni.

Vawiin programme hi LAD Director Pi Rita Lalnunmawii Pachuau chuan a kaihruai a. LAD Secretary Pi Zodingpuii’n thusawi hun a khar a ni..