Mizoram-a quality education a awm theih nana hmalakna kal zel ah vawiin khan Training on Question Setting Technique for High School and Higher Secondary lecturers chu Pi Esther Lalruatkimi, Commissioner & Secretary, School Education Department in MBSE Conference Hall ah a hawng.

Pi Esther Lalruatkimi chuan Mizoram ah Board Exam pass parcentage kum tinin a sang a, amaherawhchu  Mizo zirlai te India ram chhung hmun dang te leh ram pawn a zirlai dangte  nena inelna ah a ti tha lo leh a hniam zawkah an tang zel a, hei hian quality education kan neih that tawk lohzia a tilang a ni, a ti a. Zirchianna hrang hrang neih hnuah exam a zawhna set dan in a zir loh avangin kan zirlai te an hnufual thin tih hmuchhuah a ni a ti . Hei vang hian vawiin atanga tan tur Training on Question Setting Technique hi a pawimawh em em a ni a ti. Pi Esther Lalruatkimi chuan zirtirtute chu note siam sa leh bazar note zirtir lo turin a chah a, sawrkar school a thawk zirtirtu note siam a, mahni hlawkna tura hralh chhuak te chu sawrkar Financial Rules bawhchhia an ni a ti bawk . Private school thenkhat ah a bikin pawl 11 zirlai syllabus zir lova pawl 12 syllabus zir tir nghal an awm thin thu sawiin, hei hi sawrkar school ah an tih ve loh a beisei thu a sawi bawk a ni.

MBSE chuan India rama publisher hriat lar Macmillan Education, Oxford University Press leh MBD Group te a thawhpui a. Heng company atanga Mizoram a rawn kal Resource person ten High School leh Higher Secondary School zirtirtu te  chu ni 5 chhung training an pe dawn a ni.

Kum 2020 HSLC leh HSSLC exam atanga hman turin MBSE chuan exam dan kalphung leh zawhna zawh dan thar a duang a. Hemi zulzui hian 2019-2020 academic session  atangin zirtirna pawh kal pui mek a ni. A tum ber chu content based question atanga competency based question tam zawk zirlai naupang te tana chhawp chhuah niin , hei hian an ngaihtuahna hman thiam kawngah te, an hmalam hun atan leh school a zirna kalpui dan a tha zawk a thlak beisei a ni.