157/2023-2024

Kolasib dated 20th April 2023: Vawiin khan BRC Hall, Project Veng, Kolasibah Mizoram Board of School Education bultumin Kolasib District chhunga MBSE hnuai a High School leh Higher Secondary School zirtirtute tan ‘Capacity Building of Teachers in Setting Higher Order Thinking Skills (HOTS) Question’ tih thupui hmangin ni khat awh training neih a ni.

Training-ah hian National Education Policy 2020 chungchang inzirtirna te, Pawl 9 leh pawl 10 Science leh Mathematics zirlai bu a tawng chi hnih hman chungchang sawi zauna leh Exam buatsaih leh Integrated Evaluation Scheme (IES) kalphung behchhan a zawhna siam dan te inzirtir a ni.

MBSE chuan kum 2020 atang khan High School leaving Certificate leh Higher Secondary School Leaving Certificate exam dan leh zawhna siam dan kalphung chu her danglamin chhanna awmsa atanga chhan theih chi (Content based question) atangin zirlaiten an mahni irawm chhuak atanga chhan chi (Competency based question) zawhna tam zawk zirlaite hnen ah chhawpchhuah tum a ni a. Mizoram chhunga District 11-a zirtirtute hnen ah zawhna siam dan chungchang zirtirna pawh pek vek an ni tawh a ni.

Vawiin training-ah hian School Exam pangai leh Board Exam zawhna siam nana zirlaite thiamna leh ngaihtuahna tuaihriam nan ‘Higher Order Thinking Skills’ siam dan inzirtirna pek a ni a. Dr. Jonathan lalrinmawia, Academic Officer leh Pi Lalrinzuali Sailo, Academic Officer, MBSE-te chuan zirtirna hi pein zirlai naupangten an ngaihtuahna nasa lehzual a an hman theih nan NEP 2020 duh danin HOTS question siam tam a pawimawh thu an sawi a, Bloom Taxanomy atanga Lower Order Thinking Skills leh Higher Order Thinking Skills zawhna te zirho a ni.