Administrative Training Institute (ATI) Director Dr.Lalrozama, IAS kaihhruainain vawiin chawhnu khan MCS Probationers ten Chief Minister Pu Lal Thanhawla chu a office chamberah an hmu.

Chief Minister Pu Lal Thanhawla chuan MCS tling hlim, probationers te chu lo lawmin, sorkar inrelbawlna fung chelhtu ber tur an nih dawn tih hre reng tura chahin, midangte tana malsawmna an nih theihna turin an hna theuhte chu tui taka thawk turin a chah bawk a. Khawi hmunah pawh thawk se Pathianin a rawngbawl tura a dahna a ni tih hriaa dikna, rinawmna, taimakna leh Amah tihna nen thawk thin turin a fuih a ni.

Chief Minister chuan MCS tharte chu la kaisang zel tur an nih avangin an hnuaia thawkte tana entawn tlak ni theuh turin a chah bawk a, an hnathawhnaah ‘hei hi kan tih dan thin’ ti mai lova, sorkar inrelbawlnaah kalphung thar tha zawk tur ngaihtuah chhuak thiam thin turin a chah bawk ani. Chief Minister chuan mahni hlawh mila khawsak thiam tura ngen bawkin, an hnathawh leh an hlawh lak a inphu em tihte ngaihtuah thin se a ti a. Kuttlinglova sum lakluh tum ngailo turin a chah bawk a ni.

MCS probationers te hi an vaiin 15 an ni a, mipa 7 leh hmeichhia 8 an ni. ATI ah hian June thla atang khan training nei tanin August thlaah an zo ang.