Vawiin chawhma dar 11:00 khan Mizoram State Sports Council chuan tun hnaia Mizoram tana medal latu lawmpuina hun a hmang a, Pu T. Sangkunga MLA, Chairman, Mizoram Youth Commission chu khuallian a ni.

Mizo infiam mite inpui - Mizoram State Sports Council Office-ah medal lawmna hun hi hman a ni a, Medal lawmna huna thusawitu Pu T. Sangkunga MLA, Chairman Mizoram Youth Commission chuan infiammite hlawhtlinna chu a lawmpui takzet ani tih sawiin sports hmasawnna turah Mizoram sawrkar chuan theihtawpin hma a la reng a ni a ti.

10th Youth National Weightlifting Championship leh 53rd Men & 27th Women Sub-Junior Weightlifting Championship chu January ni 16-19,2015 chhung khan Yamuna Nagar, Haryana ah neih a ni a, Mizoram chuan ritchawi chak 13 tirin Lalremruata, Kolasib Venglai chuan kg 85 category-ah gold medal a dawng. Lalremruata hian Snatch-ah Kg.95 a rit chawiin Clean & Jerk ah Kg.125 a chawi bawk a, gold medal a dawng leh bawk. Hei mai hi ni lovin chawi rih zawng belhkhawmah a san ber a vangin gold medal a dawng leh bawk a, podium sang ber lawnin gold medal 3 a awrh ta a ni.

February ni 18-20,2015 chhung khan KAI Senior National Karate Championship-2015 chu New Delhi ah neih a ni a, he Championship-ah hian Mizoram atangin players - mipa 6 leh hmeichhia 3, an vaiin players 9 an fehchhuak a, Lalrinzuali Tuikual North chuan Kg.55 hnuailam huangah Silver medal a dawng a, FVL Hmangaihzuali, Ramhlun North chuan Kg.45 hnuailam huangah Bronze medal a dawng ve bawk.

Vawiina medal lawmna hun hi Pu John Kima, Vice President, Mizoaram State Sports Council chuan a kaihruai a, MSSC chuan infiammi hlawhtlingte lawmpuinan hian thilpek hlanin khuallian hnenah ngaihhruina thilpek a hlan ve bawk.

Attachment

  • Loading attachment...