Mizoram State Sports Council chuan vawiin chawhma Dar 11:00 khan Upper Khatla-a an office, Infiammite inpuiah tun hnaia Mizoram aiawha fehchhuak medal dawngtute lawmpuina hun a hmang a, he hun ah hian Pi Vanlalawmpuii Chawngthu, MLA (Chairperson-Mizoram Womens Commission) chu khuallian a ni.

January ni 28-30,2015 chhung khan Gandhi Nagar, Gujarat-ah National Rural Competition Group-VI intihsiakna neih a ni a, RGKA National competition Group-VI, Wrestling-ah Mizoram aiawhin PC Lalthungheti, Serchhip Dinthar chuan kg 56 hnuailam huangah Silver medal a dawng a, final-ah Haryana a hneh lo. Ronny Zorinpuia Thenzawl chuan kg 75 hnuailam huanga Bronze medal dawng bawkin medal bout-ah Himachal Pradesh a hneh ve bawk.

February ni 1 leh ni 2, 2015 chhung khan Vengurla, Maharashtra 8th Open Senior National Tug of War Championship neih a ni a, Mizoram aiawha kal Durtlang North chuan final ah Punjab 0-2 a hneh lo in Silver Medal an rawn hawn bawk.

Medal lawmna huna khual lian Pi Vanlalawmpuii Chawngthu, MLA chuan, " Sports Minister chak tak hmalakna hnuaiah Mizoten infiamnaah hma kan sawn nasa em em a, chu chu discipline tinah kan hmu mek a ni. Phaitual hnim chungah mahni inlum atangin vawiina kan infiammite an inkhel ta mek a, kan vannei takzet a ni. Thawhrimna a pawimawh a, retheihnate hian kan kawng a dal tur a ni lo. Vawiina kan hneh lohte chu a lehpeka hneh ngei turin theihtawp kan chhuah zel a ngai a ni. Hma kan sawn theihna turah sawrkarin tih theih chin a nei a, infiammiten tih tur chin an nei ve bawk. Tam tak chuan sawrkar kan rinchhan lutuk a, hei hi kan hlawhtlin theih lohna a ni fo. Eng hna pawh thawk ila, eng thil pawh ti ila, tih takzetna nen kan beih a ngai Mizoram tana mel lung thar phun turin kan puanven kan sawichhin a ngai a ni" tiin Tug of War player leh wrestler-te an kal zelna turah duhsakna a hlan bawk.

He hun hi C.Laltlanthanga, Secretary, Mizoram State Sports Council chuan a kaihruai a, MSSC chuan a tih thin danin medal latu leh team official te hnenah lawmpuina thil pek khuallian kaltlangin a nei leh a ni.