No.1876/2021-2022

Lunglei the 16th August, 2021 : Medical Operational Team on COVID-19 (MOT)-te chu an Chairman Dr. Z.R. Thiamsanga hovin Lunglei District-a Covid-19 hrileng dinhmun tlangpui leh a do let kawnga hmalakna kal mek leh hmalak tul te zirchiangin Lunglei an rawn tlawh a ni. Hemi chungchangah hian Lunglei District MLA thenkhat te leh District Level Task Force on Covid-19-te nen Lunglei DC Conference Hall-ah thutkhawmna hun an hmang.

Meeting hi Lunglei West bialtu MLA Agriculture Minister Pu C.Lalrinsanga’n kaihhruaiin Lunglei East bialtu MLA Pu Lawmawma Tochhawng, Lunglei North bialtu MLA Dr Vanlaltanpuia, Lunglei DC Pu Kulothungan A, SP Pu Rex Zarzoliana Vanchhawng, CMO Dr LC Liana leh DLTF member dangte an tel. MOT atangin Chairman Dr. Z.R. Thiamsanga leh member dang pathum - Dr Lalhmuchhuaka, Dr Joel L. Pautu, Dr Don Halliday te an tel a ni.

Meeting kaihruaitu Pu C.Lalrinsanga chuan Lunglei District-a Sawrkar lama mawhphurhna neitute, VLTF-te, tlawmngai pawl hrang hrang leh mipuite thawhhona leh tanrualna zarah Covid-19 hrilengin zia awm lam a pan mek zel hi a lawmawm takzet a ni tiin kalkhawmte chu an thil vei zawng leh hmalak tul an tih te sawiho turin a sawm a ni.

Medical Operational Team on COVID-19 (MOT) member-te chuan Covid-19 hrilengin min kiam san hun tur a hriatlova, zawi zawia nunphung pangngai a kan kir a ngaih avangin mipuiten Covid-19 nena chen ho kan zir a tul takzet a ni tiin invenna hmanrua tha ber chu mitinin kan tih theih vek Covid Appropriate Behavior (CAB) zawm hi a ni, an ti.

Hrikai hmuhchhuah hma a (early detection), enkawlna dawn hma a pawimawh takzet thu pawh sawiin mi thenkhat symptom nei, amaherawhchu in test duhlo/ngamlo, hriatchhuah hnua serious taka na ta te an awm chawk a. Symptom nei te, a bik takin khawsik, khuh leh thawhah nei te chu in test vat turin mipuite an ngen a ni.

Revised Discharge Protocol dated 19th July, 2021 chungchang pawh sawiho a ni a. He protocol hnuaiah hian natna lang chhuak lo te zing ah natna hrik hmuh chhuah a nih atanga ni 10 (sawm) chhung chu uluk taka enthlak(observe) an ni ang. Enthlak chhunga a tawp lam ni 3 (thum) chhunga khawsik an neih tawh loha harsatna an neih loh chuan chhuah (discharged) theih an ni. Chhuah dawnah RAgT/TrueNat/RT-PCR-a test a ngai lo. COVID-19 hri kai natna lang chhuakte zingah natna a lan chhuah atanga ni 10(sawm) chhung uluk taka enthlak an ni ang. Enthlak chhunga a tawp lam ni 3 (thum) chhung emaw a aia rei emaw khawsik an neih lohva, oxygen saturation pawh 95% aia sang i.e, Sp02>95% a nih bawka, harsatna an neih loh chuan chhuah (Discharged) theih a ni ang. Chhuah dawnah RAgT/TrueNat/RT-pCR a test a ngai lo va. COVID-19 hri kai damlo na zual leh natna benvawn neite chu ni 3 (thum) chhung khawsik an neih tawh loh bakah, ni 3(thum) chhung an oxygen saturation pawh 95% aia sang i.e. Sp02>95% a nih bawk chuan RT-PCR Test tih tur a ni. RTPCR test result a zirin test leh enkawl chhunzawm dan tur ruahmanna siam a ni.

Covid-19 symptom lan hma ni 2 leh symptom lan chhuah hnu ni 5 chhung hi midang kai chhawn theih hun lai a nih thu MOT member te chuan an sawi a. Symptom lan chhuah atanga ni 5 hnuah chuan kan taksa a natna do tu (neutralizing antibodies) a rawn tam a, chu chuan virus rawn beiin viral load chu a tla hniam a ni. Tuna kan discharge protocol hman mek hi a him tawk thu leh WHO, ICMR leh CDC-te pawhin hetiang ang inkaihhruaina hi an pawm thu MOT member te chuan an sawi a ni.

Lunglei DLTF, VLTF leh mipuite tanrualna chu fawkawm tiin lawmthu an sawi a, Covid-19 hirleng do kawnga CSR tanpuina tam tham tak ngaihven a ti thleng tu Lunglei DC Pu Kulothungan A chungah lawmthu an sawi bawk a ni. Medical Operational Team on COVID-19 (MOT) te hian veng thenkhat VLTF leh 4C te an tlawh bakah July ni 28, 2021-a hawn Baptist Covid Care Centre, Serkawn Lunglei an tlawh bawk a ni.