Mamit District chhunga Polling Station 110-a inthlanna buaipuitu Polling Party te chuan tukin zing dar 3:00 am hma-in EVM te DC’s Office rawn thlenpui vek a ni a, Uluk taka Receiving Counter pathum (3) siamah officers ruat bikte leh officials ten lo dawngsawngin check tur ang angte endik a nih hnu-ah Strong room-ah dah luh nghal zel a ni.

Tun tum MP (Lok Sabha) thlan-ah hian votes awm 49603 zingah votes 35676 a tla a, heng zinga 18567 hi mipa niin 17109 hmeichhia an ni thung, chu chu 71.92 % a ni. Vote tla result ah hian Tripura Transit Camp a Bru votes leh Postal Bollot a Vote an thlak te a tel lo a ni.

Strong Room-a EVM dah luh kim a nih hnu-ah DEO leh Political Party aiawhte hriatpuina-in Strong Room hi kalhin Seal vek a ni a, chu chu CRPF, 4th IR Bn leh Mizoram Police ten uluk takin an veng nghal a ni. Pu K. Lalthawmmawia MCS, District Bawrhsap Mamit chuan tun tum MP (Lok Sabha) kan thlan-na a hlawhtlin theih nana theihtawp chhuahtu, polling officials te, venhimna lam thawktute, political party hrang hrang te, thuthar thehdarhtute leh District mipuite chungah lawmthu a sawi a ni.

Vawiin chawhma dar 11:00 am khan Dc Conference Hall, Mamit-ah General Observer aiawh H.Khangsai Manager SBI, Mamit hovin Presiding Officers te papers endikna neih a ni bawk.