Mizoram Engineering Service Association chuan vawiin khan Annual General Conference vawi 29 na ni hnih awh tur chu Berawtlang Art & Culture Auditorium-ah an tan.

Conference hmanpuitu DP & AR  Minister Pu H. Liansailova chuan Conference hawnna thuchah sawiin ram hmasawnna leh ramsiamna kawngah Engineer te hian pawimawhna leh mawhphurhna sang tak an neih avangin an tangkaina te hi mipuiin kan hriat a pawimawh a ni a ti a. Chuvangin khawvel thiamna thang leh hmasawn zel karah pawh Engineer te chuan hmathlir thui tak nei thin se a duh thu a sawi a ni.

Vawiina Conference hawnna hi MESA President Er. K. Lalsawmvelan a kaihruai a, kum kalta chhunga an member boral ta 2 sunna neiin General Secretary leh Financial Secretary report-te ngaihthlak a ni. Chawhnu lamah rorel chhunzawmin an pawl inkaihhruaina dan hrang hrangte service leh a kaihhnawih thil pawimawh bakah mautam tam tuarte tanpuina chungchangte an rel hova, naktukah conference hi chhunzawmin hruaitu thar thlanna an nei ang.