Vawiin chawhnu khan Mizoram Football Association (MFA) chuan Rajiv Gandhi Stadium, Mualpuiah Annual General Body Meeting an hmang a, Social Welfare Department Minister Pu PC Lalthanliana chu Khuallian a ni.

Pu PC Lalthanliana chuan MFA hmalakna avangin football-ah Zofaten hmasawnna kan neih nasatzia chu hmuh theih mai piah lamah hriat theih in a awm a ni, a ti. MFA chu Mizorama football team tha ber, a bul leh tawp in ni, a ti a, football hlawhtlinna turin sawrkar chu hmanraw pawimawh ber a ni, a ti bawk. India ramah Mizoram chu football player siam chhuak hnem ber pawl kan ni mek a, MFA-te thawhrimna leh inpekna avangin khawvel huap pawhin football-ah Zofate hian hmun pawimawh tak kan la luah dawn a ni, Minister chuan a ti.

Health Minister leh MFA President ni bawk Pu Lal Thanzara chuan Presidential Address sawiin, kum khat chhung leka Zoram football-in hma a sawn nasat zia a hmuh theih a, I-League-ah duhthusam thleng pha rih lo mah ila, Federation Cup-a final kan thleng thei hian Mizo player-te thatzia a nemnghet a, Indian Super League-a khel turin Mizo player-te an seng lut mek zel a ni, a ti. Mizo player-te tel lo chuan India football team pawh a famkim thei lo tiin MFA President chuan Team Captain mai bakah player tha ber chawimawina te kan dawng ta hial a ni, a ti a. Football hmasawnna atana All India Football Federation (AIFF) leh FIFA duhsakna te, Mizo mipui tawiawmna leh mimal inphal te inpekna chu lawmawm a tih thu Minister Pu Lal Thanzara chuan a sawi bawk.

Annual General Body Meeting hi session hnihah thenin a thawhkhatna hi MFA Senior Vice President Pu PC Vanlalhruaia’n a kaihruai a. Honorary Secretary Pu Lalnghinglova Hmar leh Pu Lalruatsanga Tochawng ten Secretary leh Finance Report an pe a ni. Session hnuhnung zawkah hian rorel inkhawm neih niin MFA President-in a kaihruai thung a. Sports & Youth Services Director Pu Zothanmawia chu sawm bik niin he hun hi a hmanpui bawk a ni.