Kum hnih dana neih thin Mizoram Fisheries Technical Service Association chuan vawiin khan I&PR Auditorium-ah General Conference 2012 an hmang a. Parliamentary Secretary to CM Pu Lal Thanzara leh Secretary Fisheries Pu TV Fambawl ten an hmanpui a ni.
MFTSA President Pu F. Vanlallawma kaihhruai Conference hawnna inkhawmah hian Parliamentary Secretary Pu Lal Thanzara chuan sorkar Department reng reng an tet leh len a en tur ni lovin mipui tana an hnathawh leh hmasawnna an thlen dan a zirin an pawimawhna a lang zawk thin a ni, a ti. Mizoram sorkarin rethei dawm chhua na tura hmalakna pui ber NLUP kalpui mekah pawh a mawhphurtu pariat zingah Fisheries Department chu an tel ve thu tarlangin sangha khawia dinchhuah tum te tan kawl a eng tan mek a ni, a ti. NLUP chak taka kalpui mek ah hian a mawhphurtu Department leh thawktu ten sum tam tham tak an khawih thin avangin thlemna namen lo a awm theih vanga fimkhur tura chahin tun thleng hian chutiang thawm a la hriatloh avanga alawm thu a sawi a ni . Pu Lal Thanzara chuan kuthnathawktu te dinchhuahna tura Policy hrang hrang Mizorama kalpui alo ni tawh a chung zingah NLUP tluka hlawhtling leh chhenfakawm a la awm a hriat loh thu sawiin a hlawhtlinna bul ber erawh chu tihtakzetna leh dikna leh rinawmna chauh a ni, a ti.
Mizoram Fisheries Technical Association ten kum hnih kalta chhunga an hlawhtlinna hrang hrang an tarlan leh sorkar chunga lawmna chang an hriat avang te, Chief Minister Relief Fund atana cheng 30,000 lai an chhun luh leh khawmpui thupuiah NLUP hlawhtlinna an thlan avang te in Parliamentary Secretary chuan lawmthu a hrilha. Department leh Service chungchanga rawtna hrang hrang an neih te ngaihthlak sak a inhuam thu leh Staff indaihlohna nasa tak Fisheries Department in an tawh mek a hriatpui thu te sawiin Pu Lal Thanzara chuan tunah hian State pum huapa hnathawktu chuangliam senghawi leh sem rual tum mekah a enkawl lai mek Fisheries Department a lo chhinchhiah tur thu khawmpui hawnna ah hian a sawilang a ni.
Thusawitu dang Fisheries Secretary Pu TV Fambawl pawhin kuthnathawka eizawnna zingah sangha khawi chu hna nuam leh awlsam, tharchhuah hralhna tha leh hlawk a nih thu sawiin he Department-a thawktu te chu indaihlo hle mahse khawtlang hruaitu leh sangha khawitu te thawhpuina tha tak nei chunga NLUP hlawhtlinna tur pawha huaia taka hmalam pan turin a chah a ni.
Tun tum Conference atana thupui thlanchhuah NLUP hlawhtlin nana Fisheries lam chan tih hmangin Director of Fisheries Pu Dotawna chuan an hmalakna tlangpui leh hmachhawp a tarlang a. Sangha khawi thlangtu te tana a hun takah sangha chi pek a pawimawh thu a sawi a ni.
Mizoram Fisheries Technical Service Association te hian May ni 19, 2010 khan Conference hnuhnung an lo hmang tawh a. Hemi tuma an thurel Department tihlen rawtna te, an zinga mi gazetted post a hlankai dilna te chu hlawhtlinna thui tak an hmu tawh a. Lawngtlai, Serchhip, Champhai ah District Office thar hawn a ni a, Fisheries Extension Officer chu Gazetted Post-ah hlankai an ni tawh bawk. New Secretariat Complex-ah Directorate leh Aizawl District Office inkawp tur sakmek niin Kolasib-ah peihfel tep a ni tawh bawk.
Chawhnu lamah MFTSA Vice President Pu C. Laldawngliana kaihhruaiin rorel a ni a. Service Rules chung chang, Post hnawhkhah chung chang, Fish seed supply chung chang leh District Office Building chung chang te an ngaihtuah a ni.
