Mizoram Government Doctors’ Association (MGDA) Annual General Conference 34-na chu vawiin khan Aijal Club-ah neih a ni a, he hun hi Health & Family Welfare Minister Pu Lal Thanzara’n a hmanpui. 

Health Minister chuan doctor-te chu rawngbawlna hna ropui tak thawk thin, dinhmun hlu leh pawimawh taka ding an nih thu sawiin, chu an dinhmun chu chapopui tur nilovin an mihring puite tana an mawhphurhna len zia tichiangtu zawk a ni, a ti. Ram changkangte nen khaikhin chuan Mizoram chu kawng tam takah damlo enkawlna kawngah hnufumna lai la neiin, khawl leh hmanrua duhthusam pawh la nei kimlo mahse chu chu doctor ten hnathawh theihloh anga an inngaih phah mai erawh a fuh loh tur thu a sawi a; damlote thlamuan a, an rilru hneh a huaisenna pe theitu hnai berte chu doctor bawk an nih avangin hmanrua leh khawl pui tak tak aiin damlote tan anmahni doctor-te chu an pawimawh zawk a ni, a ti a. Health Minister chuan state hrisel zawk kan nih theih nan ei leh inah mipuite fimkhur a pawimawh thu leh, zuk leh hmuam, ruihtheih thil laka fihlim a tul thu te sawiin, doctor-te chu a hrechiang berte an nih avangin an awmna apiangah mipuite zirtir leh hrilhhre zel turin a chah a. Minister Pu Lal Thanzara chuan doctor-te chawlh leh mahni chenna in lum thla hlel hmanlo khawp a mipui rawngbawla an hman hlel thin chu lawmawm leh fakawm a ti a, sorkara sum harsatna leh chhan dang dang vanga doctor duhkhawp la awmlohna karah an tha thlah hauh lova thawk zel tura fuihin, association hmalakna te pawh a theihna apiangah a lo puih tur thu a sawi bawk. 

Minister hian MGDA Conference 2017 puala lehkhabu buatsaih chu a tlangzarh nghal a. Conference hawnna inkhawm hi Dr. Chawngthanchhunga, MGDA Vice President in a kaihruai a. Association member super annuation a chhuak mi paruk thlahna hun hman a nih bakah kumin chhunga an member boral ta pahnih sunna hun neih a ni a. President Dr. C. Lalhrekima leh General Secretary Dr. C. Lalchhandama ten thu an sawi bawk. Conference hawnna inkhawm zawh hian kum 2017-2019 chhunga MGDA hruaitu tur thlanna neih leh niin, rorel in a chhunzawm a ni.