No.145/2020-2021

Vawiin ni 6.4.2020 khan MGNREGA hnuaia mipui inhlawhna atan Central Sawrkar (Ministry of Rural Development) chuan Rs 16818.7 lakhs Mizoram tan a sanction a; he sanction pawisa hian Kum 2020 chhunga January, February leh March- a mipui inhlawhna, Central Sawrkar in a la pek theihloh Rs 5208 lakhs chu Rs 16818.7 lakhs ah hian a tel nghal a, hnathawh tawhna ba hi Job Card Holder-te account ah vawiin hian lut nghal tur a ngaih a ni. Kum 2019-2020 chhungin Job Card Holder zawng zawngte hian RD Block pakhat tih loh chu Ni 100 inhlawh vek an ni. Kum 2020-21 ah pawh hian ni 100 inhlawhtir theih tumin hma lak mek a ni.

Kum 2019-20 chhunga mipui inhlawhna la bat sak hi average a chhut in ni 12.46 vel a ni a. Hetianga sanction kan hmuh tak ah chuan Job Card holder tin te hian Rs 2630 theuh an account ah lut thei tur a chhut a ni. Mahse, District thenkhat-ah chuan pawisa lo lut sa a awm nual tawh avangin hemi ang diak diak hi chu Job Card Holder zawng zawngte account-ah chuan a lut vek lo ang. Tun dinhmunah hian Block thenkhatah ni 3 chauh an la bat sak laiin RD Block thenkhat ah chuan ni 19 lai te la pek loh a awm a. Ministry lamin an rawn sanction tak ah chuan kum 2019-20 chhung a MGNREGS hnuaia mipui inhlawhna zawng zawng chu bat awm lo in pek fel vek a ni ta a ni. Kum 2019-20 chhung hian nikhat inhlawhna rate chu a Rs 211/- a ni bawk a ni.

Kum 2020-21 chhung hian mipui nikhat inhlawhna rate Rs 225 ah tihsan a lo ni ta a. Tun ah hian Mizoram pumpui ah hian Job card hi 200,000-a awm mek a. Rs 16818.7 lakh atang hian nikum inhlawhna Rs 5208 lakh hi pek fel alo nih tak ah chuan Rs 11610.7 lakh hi la bang thei tur a chhut a ni a. A la bang Rs 11610.7 atang hian Job Card holder tinte hian average in ni 26 vel zel inhlawh thei tur ang a chhut a ni. Hetiang a nih chuan Job Card holder tin te hlawh tur Rs 5834 zel chu Ministry hian pawisa min rawn pe sa tihna ni a. Buai mangan lai tak a lo ni nen, hetiang ang sanction kan hmu hi kan lawm hle a ni.

Covid-19 avangin chhungkaw tinte pawn a chhuah theih loh a. Tin, ram hna a thawh theih loh bawk a. Hemi avang hian buaina leh harsatna tamtak kan tawk tih Sawrkar in a hria a. Hemi sutkian nan hian Mizoram Sawrkar chuan theihtawp a chhuah a. Hemi a tanlakna azara Sawrkar laipui in heti zat pawisa a rawn sanction hi Mizoram sawrkar chuan lawmawm a ti tak meuha. Mipui in harsatna an tawhlohna turin Project Director leh BDO zawng zawngte pawh in hma la nghal turin ka sawm tak meuh che u a ni e.