Pragati Maidan, New Delhi-a, India International Trade Fair (IITF) 2012 neih mekah November ni 18 khan mi 5000 chuangin Mizoram Pavilion an tlawh a. November ni 16 khan Lok Sabha MP Pu C.L. Ruala; November ni 18 khan Parliamentary Secretary Pu Lalrinmawia Ralte leh Principal Secretary Pu R. L. Rinawma, IRS te chuan Mizoram Pavilion an tlawh a, Stall 16 te chu uluk leh chik takin an fangkual a ni.

Pu CL Ruala chuan thil siamtute (Entrepreneurs) chu an thilsiam hnuhma (finishing) uluk leh zual tura fuihin khawvel ram zau zawk a Mizo kut chhuak pho chhuah a nih theihna tura tan la turin a chah a. Hun chep tak kara inbuatsaihna peihfel hman a nih theih avangte leh entrepreneurs te pawhin kum dang zawng aia bungrua phochhuah tur an ngah zawk avangin lawmawm a tih thu Pu C.L. Ruala hian a sawi bawk a ni.

Entrepreneurs te pawhin Pu C.L. Ruala, MP (Lok Sabha) in IITF-2012 a an tel theihna tura tan a  lak nasat zia te hria in leh train ticket thlenga a buaipui vek avangin lawmthu an sawi a, thil siam chhuaktute  hmakhua ngai a theihtawp chhuah saktu Pu C.L. Ruala chu duhsakna an hlan ve bawk a ni.

 Pu Lalrinmawia Ralte chuan Mizo thil siamtute hmasawnnate enin thahnemngai tak chunga hmalam pan turin a fuih a. Ginger powder, hmunphiah leh Mizoram Venus Bamboo ten business queries an neih nual chu lawmawm a tih thu a sawi. Pu R.L. Rinawma chuan entrepreneurs te thil siama  hmasawnna awm theih dan leh zau zawk a Market an hmuh theih dan turte a sawipui a, entrepreneurs te pawhin theih tawp chhuah an tum thu an sawi ve a ni.

IITF 2012 hi Mizoram Pavilion bik chuan Market nghialnghet zawnna atan a hmang tangkai a, bungraw hralhte chu awm tho mahse, Business tie-upsiam dan tur lam in kawhhmuhna buaipui tam a ni. Mizoram rawn tlawh tum mi thahnem takin Mizoram chanchin chipchiar taka an zawh thu he hmunah duty Tourism Department aiawh ten an sawi. November ni 18 khan mi 5000 chuangin Mizoram pavilion hi an tlawh a ni.

Mizoram Pavilion Director hi Pi Lalrodingi, Jt. Director a ni a; amah leh a thawpui dangte hian IITF hi a hmun a awmchilhin engkim an buaipui a. Stall awm te hi – Cane & Bamboo Industries Mizoram Venus Bamboo Products (P) Ltd.; Zonunsang Handloom & Handicrafts Industries; Chhinga Veng Handloom & Handicrafts; Hnamchhantu  Pawl; Mapuia Wood Decoration; Zopui Cane & Bamboo Industry; Mizoram Food Processing Industries; Fakpuii Bamboo Industries; L T Driftwood;  Zomi Village Industries;  Mawi Mawi Cane & Bamboo Industries leh Andrew Cane & Bamboo Industries te an ni.