No.6228/2020-2021

Kolasib 18th October 2020: Vawiin chawhnu khan Dr. H.Lalthlangliana, Deputy Commissioner chuan ni 17.10.20 tlai a Vairengte leh Lailapur inkar buaina chungchang sawifiahin Assam lam miten kut an thawh hmasak avanga buaina chhuak a nih thu a sawi a. Mizo hliam tuar mi 7 zingah mi pakhat chu Kolasib district Hospital a enkawl mek a nih thu sawiin a dinhmun a ngaihtuah awm loh thu a sawi bawk a ni.

Dr. H.Lalthlangliana chuan ramri buaina avanga mipui hliam tuar an awm chu pawi a tih thu sawiin,”Police-a kan hotute leh kan Magistrate-te a hmun ah a tul ang anga hma la turin an awm tawh a, an hna thawk tur hian chim buai loh theih nise a duhawm hle a ni”, a ti a, hripui leng karah ramri tlawh tum a hmun hrang hrang atanga kalkhawm chu tilo turin mipuite a chah bawk a ni. Kolasib DC chuan boruak muanawm leh mipui tan a harsatna lian zawk a thlen loh nan Sawrkarin phalna a pekte leh duty tur a kal tih loh chuan Vairengte ramri hi tlawh rih lo turin a ngen a, mahni awm hmun atangin thawktute thlamuana, tawngtaipui turin a chah bawk a ni.

Nimin tlai innawr buainaa hliam tuarte dinhmun sawiin “Mi 7 an hliam a, pakhat hi Kolasib damdawi inah enkawl mek a ni a, a dinhmun a ngaihtuah awm loh niin kan hria,” a ti a,”Assam lam ah pawh inhliam an awm nual thu hriat a ni a, chung zingah chuan pakhat chu Gungur Hospital, Silcharah an inenkawl niin kan hria” a ti. Dr. H.Lalthlangliana chuan Vairengte ramri a buaina thleng chungchangah thu diklo thehdarh a tam thu sawiin hei hian boruak chhia a siam theih avangin Social media kan hmannaah fimkhur theuh turin mipuite a ngen a, hetiang anga mipui tichiai zawng a thu diklo vawrh darhtute hi man chhuah an nih chuan dan anga hremna kenkawh a nih tur thu a sawi bawk a ni.