Kum hnih dana neih thin Mizoram Middle School Hindi Teachers Association General Conference vawi 7-na, Synod Conference Centre-a vawiina neih chu Education Minister Pu Lalsawta’n a hmanpui.

Pu Lalsawta chuan Hindi hi India mi kan nih avangin Mizote tan hian thiam a tul takzet a, kum 50 chuang zet chu zirnaah kan telh chungin kan la hmang lar lo hle a ni, a ti a. India ram State leh UT tam tak zingah Mizoram hi Hindi hman tam lohna ber State ni hialin thiam tura tih takzeta hma lak a ngai a ni, a ti bawk. Minister chuan zirlai naupang ten Hindi an thiam zung zung theih nan sorkar chuan Hindi zir dan kawng thar a dap zel a, hei hian Hindi zirna kawngah remchanna leh awlsamna a siam ngei a beisei thu a sawi a. Middle School Hindi zirtirtu kalkhawm te leh mipui zawng zawng te hnenah uar lehzuala Hindi hman a nih theih nana sorkar hmalakna tawiawm turin Education Minister Pu Lalsawta chuan ngenna a siam a ni.

Mizoram Middle School Hindi Teachers Association General Conference hi Vice President Pu Lalrohlua’n a kaihruai a. Chawhnu lamah rorelna neiin an thu ngaihtuah zingah an pawl chhung inrelbawlna thil hrang hrang te, Recruitment Rules tharin a phalsak anga Middle School Hindi teachers te kaisan chungchang te leh Education Department in khaw tinah chenna in tur, Quarters buatsaih ve se tih te a tel.

MJA General Headquarters huaihawtin kum 2012-2014 hruaitu tur an thlang a, chung te chu President-ah Zonunmawia, Sr. Vice President-ah MC Lalthianghlima, Vice President-ah Laltluanga, General Secretary-ah Lianzama Pachuau, Jt. Secretary-ah Elija Lalbuatsaiha, Treasurer-ah Lalengzami, Finance Secretary-ah BL Limbu leh Information Secretary-ah DK Chhetri te an ni.

Vawiina MMSHTA Conference hian 2010 atanga 2012 chhunga an member pui boralta mi 7 leh Education Department Parliamentary Secretary thi ta Pu Chawngtinthanga te sunna hun an hmang.