Vawiin chawhnu khan MIFCO Board of Directors te chu an Chairman Pu PC Zoram Sangliana hovin a pisaah an thukhawm.

Mizoram sawrkarin MIFCO siam that nana Early Retirement Scheme (ERR) a siam chu lawmawm tiin hnathawktu mi 77 zinga mi 56 ten he scheme hi thlangin MIFCO an chawlhsan tih an tarlang a. MIFCO a la awmte zingah hian sawrkara thawk zui duh an awm avangin Board meeting chuan sawrkara an luh theih dan kawng dap sak nise tiin an rel.

MIFCO hian hmachhawp engemaw zat neiin Bung Bangla a ran talhna chu Central sawrkar nena tangkawpin din thar leh turin hma an la mek a. A thawktu tur contractor pawh thlang fel tawhin tunah hian a hmunhma siam rem hna tan a ni a, Engineer ten an thutchilh mek a ni. Sairang Food Processing Plant ah Mineral Water siamna khawl bun tuma hmalak mek a ni a, a hna thawktu tur zawn mek a ni. Board meeting chuan heng hmalaknate hi chak takin kalpui ni se tiin an rel.

MIFCO hian Chhingchhipah sapthei tui sawr hna a tan leh ta a, kut hnathawktute thar chhuah leisak turin a inbuatsaih mek a. Sawrkar hmalakna avangin kum tin thlai thartuten an thar chhuak tam tial tial a, hengte lo lei sak vek turin nasa takin tan lak ni se tiin Board meeting-ah hian rel a ni. Sapthei bikah phei chuan NLUP nen tangkawpin Tuikum Cluster-ah sapthei chingtu chhungkaw 612 te nen hma an la ho mek a, thlai thar lei kawngah pawh NLUP nena tanho zel tha an ti a ni.