No.7385/2020-2021

Vawiin khan Animal Husbandry and Veterinary (AH&Vety) Minister Dr.K.Beichhua hovin Mizoram State Animal Welfare Board (SAWB) Governing Body Meeting hmasa ber chu SAD Conference Hall, MINECO-ah neih a ni.

Vawiin meeting-ah hian agenda 4 chhawpchhuah a ni a. Mizoram State Animal Welfare Board chu hun engemaw chen ding tawh mah se hna thawk thei tura tihnun (activate) a ngaih avangin vawiin meeting-ah hian he Board inrelbawlna kenkawh dan tur sawiho a ni a. AH&Vety Directorate-ah Joint Director kaihhruaiin Animal Welfare Division siam ni se tih rawtna chu pawm a ni. District tinah Deputy Commissioner te kaihhruaina hnuaiah District Society for Prevention of Cruelty to Animals (DSPCA) pawh hna thawk thei tura din thar leh vek ni se tih rawtna pawh pawm a ni a. He Board tan hian sum awm sa a awm loh avangin an inrelbawlna tur leh hmalakna tur sum mamawh te ruahmanna siamin State Sawrkarah dil ni se tiin an rel a ni.

Sumdawn nana ui inthlah tir (breeding) chungchangah dan lek kawh thuai ni se, tiin an rel a. Dog Breeding and Marketing Rules 2017 leh Pet Shop Rules 2018-a register te chauh ui note leh pet animal dang - zawhte, sava, sangha an zuar chhuak thei tawh ang. Implementation of Prevention of Cruelty to Animals (Dog Breeding and Marketing) Rules, 2017 leh (Pet Shop) Rules 2018 kenkawh dan tur chungchangah hian AH&Vety Department hnuaia Animal Welfare Division chu mawhphurhna pek ni se tia rawtna chu meeting hian a pawm a ni.

India ramah Animal Welfare hi ran chunga hleilenna ven nan chauh kalpui a ni thin a. Kum 1962 khan “The Prevention of Cruelty to Animal Act, 1960” Section IV hnuaiah Animal Welfare Board of India hi din a ni a. Ran humhalhna dan leh ran chunga hleilenna chi hrang hrang venna dan te tha taka zawm a nih theih nan Animal Welfare Board of India hian kum 60 dawn hna a lo thawk tawh a ni.