No.2903/2020-2020

Vawiin khan SAD Conference Hall-ah Minister Dr. R. Lalthangliana chan department pathum Health & Family Welfare, Higher & Technical Education leh Commerce & Industries vil tura Mizoram sawrkarin a ruat Consultative Committee thutkhawm hmasa ber neih a ni a, he inrawnkhawmnaah hian Committee member zingah Pu lalrintluanga Sailo, Dy. Govt. Chief Whip, Pu H. Biakzaua, MLA, Pu C. Ngunlianchunga, MLA, Pu Andrew H. Thangliana, MLA bakah heng department pathuma hotu pawimawhte an tel a ni.

Meeting kaihruaitu Dr. R. Lalthangliana chuan Minister te enkawl department hrang hrangte hnathawh leh hmalakna te enpui tura sawrkarin Consultative Committee hi din a nih thu a sawi a, langtlang taka thil kalpui a nih theih nan party hrang hrang aiawh MLA te Committee ah hian an tel a, COVID-19 hripui leng vangin duh angin tuman hma an lak chak theihloh bakah Committee thutkhawm pawh hma takah neih a harsat phah a ni, a ti a. Thutkhawm hmasa ber a nih angin hmalakna leh hmachhawpte sawiho a zau taka ngaihtuahna seng turin kalkhawmte a sawm a ni.

Department hrang hrang ten an hmalaknate an sawifiah hnu ah sawiho ngai laite leh inzawhfiah tul te inzawhfiahna hun hman a ni.

Higher & Technical Department report danin COVID-19 hripui leng vangin National Testing Agency kaltlanga NEET exam (MBBS/BDS/BHMS/BAMS) sawrkar laipuiin kum tin a buatsaih thin chu kumin May thla a neih tura ruahman lawk a ni chungin September ni 13, 2020 a sawn hlat a nih thu leh JEE exam (B.E/B.Tech) April a neih thin pawh September ni 1-6 chhunga neih tura sawn hlat phawt a ni a. NEET leh JEE in a huam loh State quota seat hrang hrang - B.Sc (Agri.), B.Sc (Horti), B.Sc(Fisheries), B.Sc (Forestry), B.VSc, B.Sc(Nursing) etc. Mizoram sawrkara Higher & Technical Department-in SMATEE kaltlanga kumin April tla tawpa exam a buatsaih tum pawh tiam chin awm lova thulh rih a ngaih thu te, Diploma Seats quota atana exam buatsaih tur pawh chutiang bawka thulh rih a nih thu leh, boruak thlira exam neih thuai a nih theih nan hmalak mek a nih thu report a ni.

Heng bakah hian Higher & technical Education Directorate hnuaia hmalakna hrang hrangte leh Mizoram District hrang hranga Polytechnic thar din tura hmalakna bakah Mizoram Engineering College, RUSA hnuaia hmalakna, Lungleia Mizoram University Southern campus chungchangte pawh report niin sawiho a ni a. Aizawl pawna College hrang hranga zirlai enrolment awmze nei zawk leh inkhairual zawk a awm theih nan hmalak a tul thu te, College ziritirtu zingah aikal la an tam thute sawiin niin hmalak chhunzawm tura tih a ni a. Ram pawna lehkhazir tura chhuak COVID-19 vanga lo haw te leh he hripui vanga Mizoram pawna lehkhazir tura ngaih zir leh ta lo tur an awm teuh dawn ni a hriat a nih avangin ngaihtuahna sen uluk a tul thu sawi a ni.

Commerce & Industries Department pawhin an hmalakna hrang hrang an tarlang a, Mizoram Industrical Policy peihfel tep a nih thu te, sawhthing hralh chungchanga harsatna kumhlun kan tawh thin chingfel turin central sawrkarah pilot project tur concept note pariat thehluh tawh a nih thute,Microfood Processing lama hmalakna turte, Industrial Growth centre a ram nei hma la thalote chungchanga hmalak dan turte sawiho a ni.

Health & Family Welfare Department pawhin an hmalakna hrang hrang an tarlang a, a bik takin COVID-19 do kawnga hmalakna bakah Zoram Medical College chungchangte, natna chi hrang hrang dona programme a hmalakna te, thingtlang mite hriselna tura hmalaknate chipchiar taka sawiho a ni.

Consultative Committee hi June ni 21, 2020 khan din niin Minister Dr. R. Lalthangliana department chan bil viltu Committe member te chu a hnuaia tarlante hi an ni.
Chairman : Dr. R. Lalthangliana, Minister
Members :

1) Pu Lalrintluanga Sailo
2) Pu H. Biakzaua
3) Prof. F. Lalnunmawia
4) Pu C. Ngunlianchunga
5) Pu Andrew H. Thangliana

Member Secretaries :
1) Secretary, Health & Family Welfare Department
2) Secretary, Higher & Technical Education Department
3) Secretary, Commerce & Industries Department

Ex-Officio member : Secretary, PAD