Tukin khan South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister ni bawk Dr R. Lalthangliana chuan  Hnathial khawpui chhung Kanaan Venga NH 54 kawng tlahniam metre 60 vel zeta thui chu a hmunah tlawhin a rang lama hmalak dan tur sawrkar official-te leh khawtlang hruaitute a sawipui.

He kawngpui hi Mizoram chhimlam khua ten chak an lakna pawimawh tak niin Nikum fur lai June thla tir khan a tlahniam a. Hun engemawzat khar a nih hnu in tun dinhmun ah LMV leh a hnuai lam an tlan tlang mek a. Sawrkar department hrang hrang - PWD, Geology and Mineral Resources leh Disaster Management & Rehabilitation ten helai kawng siamtha tura hmala mekin sawrkar laipui Ministry of Road, Transport and Highways kaltlanga Bailey Bridge siam tum a ni. Dr R Lalthangliana chuan helai kawngpui tla hniam siam that chu mipui te tana pawimawh tak anih avangin uluk leh chak taka thawka, kawng tlo leh tha siam turin Department hotute chu a hrilh a. Department hotute leh khawtlang hruaitute lam atanga harsatna awm te pawh ngaihthlak sakin chak taka hnathawh tan a nih theih na tura hmalak dan tur a sawipui.

Minister hian vawiin atanga ni thum chhung a bial fang kualin hmasawnna hna kal mek leh hmachhawp hrang hrang te a hmunah kalin a enfiah dawn a. Vawiin hian Tarpho, Khawhri leh Thingsai khua te a tlawh dawn a ni. Minister hi Pu J. Hmingthanmawia, Director Commerce & Industries, Dr F. Lallianhlira, Principal Director H&FW, Pu R. Lalrintluanga, CE (Road) PWD, Dr H. Lalchungnunga, Director, DHS, Dr T.Lalhmangaihi, Director, DHME leh Pu HD Lalrintluanga, Joint Director Commerce & Industries te bakah Lunglei District official te, MJA hruaitute, khawtlang hruaitute leh party hruaituten an tawiawm a ni.