No.2069/2021-2022

Aizawl, 31st August, 2021 : Dr. R. Lalthangliana, Minister, Health & Family Welfare, Higher & Technical Education leh Commerce & Industries department changtu chuan ni 4 thang turin nizan khan New Delhi a thleng a, vawiin atangin sawrkar laipuia Ministerte leh hotu pawimawhte a dawr kual nghal.

Minister hian vawiin chawhma dar 10 khan Union Secretary, DoNER Dr. Inder Jit Singh a hmu a. India hmarchhak state tana 10% GBS Ministry hrang hrang in a an dah thin chu National Education Policy 2020 tihhlawhtlin nana hman tangkai dan tur leh kalpui chhoh theih dan tur a sawipui a. Hemi tihhlawhtlinna atan hian leh department dang mamawh phuhrukna tur atan tun hma a an lo tih dan ang lova, awlsam zawka hman theih dan tur a sawipui. Minister hian 10% GBS India hmarchhak state hrang hrangte tana Ministry hovin an chhun khawm thin chu thawhkhawm that/thehluh that a nih leh nih loh DoNER Secretary hi a zawt bawk a ni. Dr. R.Lalthangliana hian North East State hrang hranga Health Minister te, Union Health Minister chairman na hnuaiah a rang thei ang bera meeting neih a rawt chu DoNER Secretary hian alo ngaih pawimawh sak hle ani.

DoNER Secretary hian State sorkar in UC submit chungchangah te leh proposal siam chungchangah te Mizoram sawrkar in a tih ve awm chi ah uluk leh zual a buatsaih a ti turin thurawn a lo pe a ni.

DoNER Secretary nen an inkawm zawh veleh hian Dr. R. Lalthangliana chuan AYUSH Secretary Pu Vaidya Rajesh Kotecha chu a office ah hmuin an meeting naah hian sawrkar laipuia Special Secretary, Joint Secretary leh Director hote an tel bawk a ni. Mizorama covid hripui leng dona kawnga Ayush Doctor leh hnathawktute an tangkai zia Minister hian sawiin, Ayush doctor te a bik takin hna hmu lo tam tak an awm tih sawiin, PHC leh CHC hrang hrang leh tuna Health and Wellness Centre a thawkte bakah hian rawih belh theih dan tur kawng ngaihtuah a an hlawhte pawh tum sak turin Minister hian a thlen bawk ani. Mizoram Dist 11 (sawmpakhat) ah Ayush Hospital sakna tura ruahmanna amah ngeiin tunhma a a lo thlen tawh chu ngaituah tha leh turin a ngen bawk a. Mizoram chu India ramah Medicinal Plant nei tha berte zinga mi a nih thu sawiin, mi tam tak tana eizawnna tlaka hmalakna tur ruahmanna nikum lama an hnena a lo thlen tawh bawk chu bawhzui leh in heng a thu thlen ho hi Ayush Secretary hian a lo ngai pawimawh hle a ni.

Hemi hnu hian Health Minister hian MSME Secretary Pu B.B.Swain, Economic Adviser leh Joint Secretary te meeting neih pui lehin Covid-19 avanga Mizoram MNF Flagship Programme SEDP hmanga eizawnna ruahmanna kawngah khaihlakna leh harsatna an tawh thu a thlen a. Mizo thalai rual tam tak ten eizawnna ngelnghet an neih theihna tur kawng hrang hranga training lian tham pekna tur ruahmanna Ministry of Micro, Small and Medium Enterprises (MSME) ah hian a thlen a, Secretary te hian an lo ngai pawimawh hle a, theihtawp chhuaha hma lakpui an tum thu leh heta tan a ruahmanna uluk leh awmze nei tak rawn siam nghal turin Minister hi an lo ngen ani.

Chawhnu lamah hian Union Health Minister Pu Mansukh Mandaviya hmuin Health Ministry a official pawimawh tak tak Addl.Secretary cum NHM Mission Director, Jt.Secretary - RIPANS lam in-charge te leh Covid-19 dona kawnga mi tangkaite an tel bawk a. Mizorama Covid-19 dinhmun tlangpui report Minister hian a pe a ni. Union Health Minister hian Covid dona leh vaccination chungchangah Mizoram chu ti tha hle a a hriat thu lo sawiin lawmpuina thu Mizoram Health Minister chu a lo hlan bawk a ni. Dr. Thangtea chuan Covid-19 third wave lo thleng tur atana inbuatsaihna kawnga Mizoram sorkar hmalak mek leh chung atana Mizoram mamawh tur thil chi hrang hrangte union Health Minister hi a sawipui bakah Mizoram a JICA fund hmanga Superspeciality Cancer Hospital dinna tur atana hmalakna tamtak cheng vaibelchhe 500 lai mai senga bul tan tur hi a rang thei ang bera rawn tan turin a ngen a, hetah hian Technical Appraisal Report a thehlut nghal bawk a ni. Mizoram Health System Strengthening Project, World Bank pawisa hmanga hna tan mek tawh chungchangte leh RIPANS tana kum 2009 bul lama cheng vaibelchhe 480 lai mai sanctioned awm tawh atanga hmalakna chi hrang hrang thuanawp ta rihte leh RIPANS hnuaia teaching leh non-teaching staff te harsatna chi hrang hrang, an service leh hlawh chungchangte chu Minister hian a thlen nghal bawk a ni. Heng a thuthlen ho te hi Pu Mansukh Mandaviya, Union Health Minister hian a lo dawngsawng tha em em a, theihtawpa lo puih a inhuam thu alo hrilh a ni.

Dr. R. Lalthangliana hi Pu Amjad Tak, Resident Commssioner, Pi Nazuk Kumar Director, Higher & Technical Education, Dr. Zarzoliana, Jt.Director (RUSA), Higher & Technical Education Deptt., Govt.of Mizoram leh Dr. Hmingthankimi, Consultant, Health Deptt., Govt of Mizoram ten an tawiawm a ni.