No.2089/2021-2022

Aizawl, 1st September, 2021 : Sawrkar laipui dawra New Delhi-a cham mek Dr. R.Lalthangliana, Health & FW, Higher & Technical Education leh Commerce & Industries Minister chuan vawiin khan Union Education Minister Dharmendra Pradhan-a chu a office ah hmu in Mizoram University - Southern Campus, Lunglei a dinna tur senso cheng vaibelchhe 400 dilna an lo thehluh tawh chungchang sawipuiin mamawh chi hrang hrang thawktu lak chungchangte, hostel building, faculty building sakna chungchangte a sawipui a, Mizoram sorkarin a dinna tur ram a tihfel tawh thu hrilh nawn lehin chaktaka hmalakpui turin a thlen a ni. RUSA chungchanga faculty hlawh leh thil dang tangte a tan rei tawh avangin hlawh tur sum release khawtlaia awm te chu pe chhuak thuai turin a ngen bakah RUSA-3 hi rawn kalpui leh ngei turin Dr.R.Lalthangliana hian Union Education Minister chu a ngen bawk a, Union Minister hian hei hi chak takin bawh zui mek a nih thu alo hrilh a ni. Dr. R. Lalthangliana hian RUSA-1 leh RUSA-2 hi vawikhatmah thlirletna ‘review’ Minister level ah neih a la ni lo chu mak a tih thu leh review neih pawimawh a tih thu a thlen chu Union Minister chuan a lo ngaihpawimawh sak hle a, lo ngaihtuah zui vat a tum thu a hrilh a, India hmarchhak state a Higher & Technical Education Minister-te pual bika meeting ko tura a thlen te pawh a ngaih pawimawh thu sawiin, tihhlawhtlin ngei a tum thu a lo hrilh a ni. Literacy rate ah India ramah kan that viau laiin Higher Education a gross enrolment ratio lamah National level kan phak loh thu tarlangin Union Minister hian Mizorama Higher Education hmasawnna ngaihpawimawh a nih tur thu a lo hrilh bawk a ni.

Dr. R. Lalthangliana hian US Embassy a senior officials te - Pu Brian Health, Pu John Fazio, Second Secretary, Office of Political Affairs, Pu William Harford, Second Officer, Environment, Science and Technology Affairs, Dr. Preetha Rajaraman, Regional Representative for South Asia te hmuin, inkawmna tha tak an nei thei a. Minister hian Embassy officials te hi USA a kal hmasak tuma World Bank hnuaia health system strengthening project a hlawhtlinna an hmuh chungchangte leh International Aids Headquarter a an hotute a kawm thute a sawipui a, Embassy Senior Officials te hian kawng hrang hrangah Health Sector bika Mizoram tana hmalakpui theih tur an neih leh tangkai tur te Minister hi an lo hrilh a ni.

Hemi zawh hian Dr. Vinok K Paul, Member, Niti Aayog hmuin covid-19 hnu a Mizoram dinhmun tlangpui leh covid-19 chhuah tan tirh atangaMizoram sawrkar hmalakna tlangpui te a sawipui a. Mizoram Health Department in an mamawh a bikin ICU leh Dealth Deptt. hmalakna atana pawimawh tur Niti Aayog anga buaipui theih turte an sawi dun nghal a. Post Covid in Mizoram economy kawng hrang hranga a tihtlakhniam avanga Niti Aayog atanga Mizoramin a kan mamawh tur tulte enpui leh zir chiang tura Niti Aayog atanga mithiam rawn tira, ngaihtuahpui tura a thlen chu Dr. Vinok hian a lo ngaipawimawh hle a, a rang thei anga bawhzui vat a tum thu a lo hrilh a ni.

Niti Aayog meeting hnuah hian Dr.R.Lalthangliana hian Union Textiles Secretary Shri Upendra Prasad leh Addl.Secretary, Commerce Pi Rachna Shah te an office ah a kawm leh a. Addl.Secretary, Commerce hnenah hian Minister hian Bangladesh nena insumdawn tawnna tur atana hmalakna kal mek a Bangladesh Minister Pu Tipu Munshi te nena March thla a an sawi dun tawh joint visit an neih tur chungchangte a sawi pui a, India sorkar pawh lo inhawng tur leh theihtawpa tan lo lakpui turin a sawipui a ni. Textiles Secretary hnenah hian trade item tur chi hrang hrang handicraft, handloom leh industrial unit hrang hrangin an tih theih tur ang chi atana comprehensive projects DPR siam dan tur ngaihtuahpui turin leh hemi atan hian a tul anga Ministry atanga mithiam rualin Mizoram rawn tlawh a, a remchang hmasa bera sawi hona nei turin Minister hian a thlen a, hei hi tihhlawhtlin ngei an tum thu an lo hrilh a ni.

Health Minister hian Prof. Dr. Balram Bhargava, Indian Council of Medical Research hmuin ICMR in Mizoram tana VRDL Lab, Zoram Medical College (ZMC) tana an pek chungchangte leh khawl dang tam tak RTPCR test kit te, RNA extraction kit leh thil dang tam tak inhawng taka Mizoram tana an pek thin chungchangah lawmthu a sawi a. Thildang mamawh pawh Minister hian ziakin a thlen lehnghal a. ICMR hotute chuan theihpatawp an lo chhuahpui zel tur thu an lo hrilh a ni.

Hei bakah hian Gen. (Dr.) VK Singh, MoS, Road Transport & Highways hmu lehin Darzokai-Tuipui D lei cheng vaibelchhe 80 senga dawhna tur chungchang chu a sawipui a. MoS hian a rang thei ang bera hma lo lakpui turin a lo tiam a ni.

Minister hian nimin tlai lam tawhah khan Pu Arjun Munda, Union Minister, Tribal Affairs hmu in Tribal Affairs fund atanga Mizoram tana CHC te, PHC te, Sub Centres tlabal tawhte thuam thatna tur leh Mizoram college hrang hrang tana (National Education Policy lo awm tur atan) infrastructures mamawh ho heng – college building, hostel, staff quarter etc. te a thlen a, Tribal Affairs Minister hian DPR te siam a hma rawn la turin Dr.Thangtea hi a lo hrilh a ni.

Dr.R.Lalthangliana hi Pu Amjad Tak, Resident Commissioner, Mizoram House, New Delhi, Pi Nazuk Kumar, Director , Higher & Technical Edn., Pu Zarzoliana, Jt.Director (RUSA), H&TE, Govt. of Mizoram ten an tawiawm a ni.