2661/2022-2023
Aizawl 14th November, 2022: Dr R. Lalthangliana, Health & Family Welfare, Commerce & Industries leh Higher & Technical Education changtu Minister chuan New Delhi-ah zinin vawiin khan a department hmalakna leh hmachhawp thil pawimawh chi hrang hrangah sawrkar laipui a dawr.

Vawiin chawhma dar 9:30 khan Dr Thangtea hian Union Minister of State for HRD & External Affairs Dr Ranjan Singh chu a chenna inah hmuin Mizoram University, Southern Campus din tur thu kum 2020 January thlaa Ministry of HRD in notification a lo tihchhuah tawh, Mizoram University lam pawhin theihtawp chhuaha DPR te an thehluh tawh vawiin thlenga hmasawnna thar la awm lo chu a sawipui nawn leh a, He campus hi mipuite nghahhlelh, Mizoram University a awm lo course engemawzat awmna tura ruahman a nih thute sawiin, Ministry hnuaia officialte pawh vawi tam tak a sawipui tawh hnua awmzia a awm hleithei lo chu a ngaimawh thu hrilhin Ministry of HRD a official pawimawhte leh file khawihtute tun kar chhung ngei a kova chinfelpui turin a thlen a, mahni inchawm tura tih chu COVID hripui lengin a nghawng nasat avangin State sawrkar tan chuan tihngaihna a awm lo tih a hrilh bawk a ni.

Heng bakah hian Dr Thangtea chuan Mizorama district thenkhat Kendriya Vidyalaya Sangathan (KVS) la awm lohna hmunah te ram kan pe thei a nih chuan din turin a ngen a, Dr Ranjan Singh hian chutiang hmun a awm thei a nih chuan DPR siama thehlut rang tura thurawn lo pein hma a lo lak tur thu a hrilh a, KVS leh polytechnic hmunhma sak mek district hrang hrang a mite sak hna muang lutuk a ngaimawh thu Dr Thangtea hian a hrilh bawk a ni.

Dr Ranjan Singh hian MoS for External Affairs a nihna anga tun thla November ni 20 – 23 chhunga Dhaka, Bangladesh ah External Affairs meeting nei tura a kal tur thu a sawi chu remchangah lain Dr Thangtea hian Bangladesh nena kan insumdawntawnna tur Integrated Check post (ICP) Kawrpuichhuah leh ramri hmun hrang hranga border trade kalpuina tur hmun ruahmante a hrilhfiah a, Bangladesh lamin an tih tur an tih muan avanga hmalakna khaihlak chungchang sawiin bawhzuisak turin a ngen a, Union MoS hian lehkha nen chiang taka ziaka pe turin leh a lo bawhzui ngei tur thu a lo hrilh a ni. Dr Ranjan Singh hian kum thar March-April bawr vela Tokyo, Japan-a “North East Festival” neih tura tel turin Dr Thangtea hian lo sawm nghal a ni.

Hemi hnu hian Dr Thangtea hian Ministry of Commerce tlawhin Joint Secretary M. Balaji nen an inkawm a, Commerce lama Mizoram sawrkar hmalakna chi hrang hrangte an sawi dun a ni.

Hemi hnu hian Ministry of Micro, Small & Medium Enterprises (MSMEs) dawrin MSMEs Secretary Pu B.B. Swain-a leh official pawimawhte a hmu a, Mizorama Industry hrang hrangte tihchangtlunna tur DPR an siamte a bawhzui tih sawiin tha takin an lo dawng sawng a, Flatted Factory Complex pali - IGC Luangmual (Rs 9.98cr), Industrial Estate Kolasib (Rs 14.99cr), IIDC Pukpui, Lunglei (Rs 9.98cr) leh IIDC Zote, Champhai (Rs 9.93cr) tihhlawhtlinna tur DPR pawh reiloteah an tihfel theih dawn tawh thu Minister hi an lo hrilh bawk. Tool House (Industrialist ten khawl/hmanraw chi hrang hrang an inhmantawm theih tur ruahmanna) chungchang Minister in a sawi chu a hmunhma an neih phawt chuan an pek hreh loh thu leh a rang lama DPR siam vat turin an lo chah a ni.

Dr. Thangtea hian Union Health Secretary Dr. Rajesh Bhushan a office ah hmu lehin, Health department hmalakna chi hrang hrangte an sawidun a. Minister hian Zoram Medical College (ZMC) tihhmasawnna tur chi hrang hrang atana DPR thehluh tawh chungchangte a sawi leh harsatna an tawhte sawipuiin hmalak chhunzawm zel dan turte an sawi dun a, JICA Project Cancer superspeciality Hospital sakna tur a tira vbc 500, JICA hovin an revise hnua vbc 700 a nih taka vanga vbc 200 dang pekchhuahna tur NOC Ministry of Health & Family Welfare in an pek ngai chu rang taka tih a tul thu a thlen chu Dr Rajesh chuan an lo bawhzui nghal tur thu hrilhin, hemi hnu hian DoNER Ministry atang NOC lak leh a ngai a, anni chuan Ministry of Health in an pek chuan an lo pek ve nghal tur thu an hrilh tih a sawi bawk a ni.

Hemi hnu hian Minister hian NITI Aayog member, Health changtu Dr. VK Paul hmu lehin CSR kaltlanga Mizoram chhunga CHC leh PHC zawng zawng tihchangtlunna tura ruahmanna tih hlawhtlin thuai a tul thu thlenin a ni hian hma a theih anga chaka an lak mek thu a lo sawi a, Dr Thangte a hian ZMC tihchangtlunna tur DPR engemawzat a thehlut bawk a, NICU khum 20 atana mamawh zawng zawng tih sak an tum thu a lo hrilh bakah Civil Hospital, Aizawl-a MRI khawl lian dah tur pawh chak taka hma an lak zel thu a sawi a, kumin December ni 15 hma ngeia Mizoram rawn zin a tum thu Dr Thangtea hi a lo hrilh bawk a, ZMC Academic Building pawh December ni 15 hma a Union Health Minister in a hawn tura ruahmanna siam tha an ti a, NHM pawisa second installment tang mek cheng nuai 3300 release thuai tura hmalak sak tura ngenna chu lo bawhzui a tum thu a sawi bawk a ni.

Dr Arun Kumar Sharma, Director-General, NECTAR pawh Dr Thangtea hian hmuin Health & Family Welfare, Commerce & Industries leh Higher & Technical Education ten anmahni kaltlanga hmalakna an neih theih dan tur a sawipui a, Minister in a sawmna angin December thla chawhma lamah lo zin a tum thu a sawi bawk a ni.