No.2901/2021-2022 

Aizawl, 6^th November, 2021 : Vawiin chhun khan Dr. R. Lalthangliana, Minister, H&FW etc., chuan State Bank of India, Luangmual Branch a hawng. SBI Luangmual branch hawnnaah hian Deputy Govt. Chief Whip Pu Lalrintluanga Sailo leh Aizawl West-I bialtu MLA Pu Zothantluangate an tel a ni.

State Bank of India, Luangmual Branch hawnna inkhawm buatsaihah khuallian Dr. R. lalthangliana chuan thu sawiin Aizawl tlak lama cheng mipuite tana rohlu kan nei thar hi a lawmawm takzet a, banking services hrang hrang kaltlangin malsawmna a keng tel dawn a, mipuiten tangkai takin an chhawr dawn tih sawiin Aizawl West mipuite lawmpuina a hlan a ni.

Dr R. Lalthangliana chuan Aizawl tlak lam bial hi hmun pawimawh leh hulum a la ni deuh deuh dawn a, zirna in pawimawh tak takte pawh dah belh zel niin tunah hian Aizawl West College sawnna tur hmun pawh kan tifel leh tawh a, Aizawl tlak lam hi hmunhma a la that avangin hmasawnna hna lian tak tak pawh thawh a la nih zel a rinawm avangin branch hrang hrang hawn belh a tul a ni, a ti a. State Bank of India chu Mizoram pumah a tam thei ang bera inzarpharh tura a duh thu leh a tul chuan Mizoram sawrkar pawhin theihtawp a chhuahpui hreh loh thu a sawi a ni.

Minister chuan Mizoramin COVID-19 a hmachhawnna kawnga State Bank of India-in nasa tak hna  a thawhnaah lawmthu sawiin, COVID-19 hripui vanga harsatna tawk chhungkuate chhawmdawlna tur ruahmanna an siam tih sawiin, sawrkar laipuiah an bawhzui dawn tih a sawi a, he ruahmanna hnuaiah hian chhungkaw 50000 tal tuam an tum thu a sawi bawk a ni.

Deputy Govt. Chief Whip Pu Lalrintluanga Sailo pawhin bank tel lovin khawvel sumdawnna leh hmasawnna a kal thei tawh lo a ni ber a, State Bank of India, Luangmual Branch hawn a ni ta chu a veng neitupa ka nihna ang pawhin ka lawm takzet a, hei hian Luangmual leh a chhehvelah nasa takin hmasawnna a rawn thlen ngei ka beisei tlat a ni, a ti a. Bank in tluang taka hna a thawh theihnan khawtlangin a tul ang angah an pui inhuam tih a sawi a ni.

Bialtu MLA Pu Zothantluanga pawhin a biak chhunga State bank of India in branch thar an hawng chu a lawm takzet tih sawiin kan bial tan ni chhinchhiahtlak a ni,a ti a. Aizawl West-I bial hi Aizawl khawpuia bial zawng zawng zinga mihring cheng tamna ber a nih bakah mihring pun chakna ber a nih avangin kan mamawh takzet a, State Bank of India hotute leh thawktu zawng zawngte chungah bial mipui aiawhin lawmthu ka sawi a ni, a ti.

Pu LP Lalchangkima, Regional Manager, State Bank of India chuan Aizawl tlak lam tan Vaivakawn Branch chiah an neih avangin mipuite a tuam zo tawh lo hle a, Branch dang hawn tumin hma kan la reng a, Luangmual Branch kan han hawng thei ta hian mipuite harsatna nasa takin a chhawk kan beisei a, a tul anga Branch dang hawng lehzel turin rilru pawh kan siam a ni,a ti a. Bank chu a thawktute ta ni lovin mipuite ta a nih avangin mipuite service tha tak pe turintan kan la sauh sauh a, harsatna leh lungawi lohna nei kan awm a nih chuan Regional Office ah pawh telephone hmangin engtik lai pawhin a thlen theih a ni a ti a. State Bank of India chuan Mizoram Economic Revival Plan duangin mipuiten eizawnna ngelnghet an neih theihnan tan an la tih sawiin, a bul tan nan vawk vulh lama tuite tan vawk loan an pe tih a sawi a, nasa taka hma an lak mek laiin vawk pul hri hlauhawm tak African Swine Fever (ASF) a rawn leng a, hei hian kan hmalakna a tikhaihlak rih a, hrileng a reh veleh hma kan la chhunzawm le hang a ti a, vawk loan a tam thei ang ber pekchhuah an tum tih sawiin, thingtlangb khawtin tuam chhuah an tum thu leh khawpuiah pawh hmunhma nei tha tan vawk loan an pe thei tih a sawi bawk.

Sumdawng Loan pawh thla tin mi 10 hnenah tal pe chhuak tura tan la turin an Branch zawng zawng an hrilh tih sawiin Pu LP Lalchangkima chuan sumdawnna bul tan duh tan an inhawng hle tih a sawi a, heng bakah hian Agriculture loan leh loan dang chi hrang hrang mipuite tan an chhawpchhuak tih a sawi bawk a, sawrkar hnathawk lo tan pawh heng loan te hi a dil theih reng a, tumah an thliar hrang lo tih a sawi bawk a ni.

Banking service mizo thalaiten ngaihven se a duh thu sawiin Banking service examah mizo thalaite an tling tlem thin hi a pawi takzet a, hna tha tak a nih avangin mizo thalaiten ngaihven se a duh takzet tih a sawi a ni.

State Bank of India, Luangmual Branch hi Mizorama SBI branch 46-na a ni a, Luangmual Chhangurkawnah a awm a ni.

State Bank of India, Luangmual Branch hawnnaah hian Pu H. Lalramliana, Luangmual Local Council Chairman pawhin thu sawina hun a hmang a, he hun hi bialtu AMC Executive Councillor, khawtlang hruaitute leh khawtlang mi challangte bakah SBI staff ten an hmanpui bawk a ni.