No.3165/2019-2020

Vawiin khan Health & Family Welfare Minister Dr. R.Lalthangliana'n Mizoram Kohhran Hruaitute Committee (MKHC) te a Pisa-ah kawmin, tunlai hri lèng Novel Coronavirus (COVID-19) dona kawnga Kohhran leh Sawrkar hmalakna hrang hrang te an sawiho bakah hmalak zel dan tur an sawiho a ni.

Health Minister Dr. R. Lalthangliana chuan Novel Coronavirus (COVID-19) dona kawngah leh mipuite an him zawk nana kohhran hrang hrang hmalakna-ah lawmthu a sawi a. Kohhran thenkhat phei chuan fimkhur thil-ah Biakin inkhawm engemaw chen ti tawp rih hial a kohhran memberte himna an ngai pawimawh chu Health Minister a nihna ang pawhin chhuanawm a tih thu leh hmalakna duhawm tak a ni tih a sawi.

Chhungkaw tam tak eizawnna 'bazar' hmunah mi tamtak nitin an la kal reng chu mipui tan a him loh avangin Commerce and Industries Minister a nihna angin AMC Mayor leh officials, Commerce and Industries Secretary leh Department lam te nen hmalak dan tur a ngaihtuah mek tih a sawi a. Novel Coronavirus (COVID-19) vanga mitthi sawngbawl dan tur chungchang pawh Chief Secretary Pu Lalnunmawia Chuaungo Chairman na, State Level Task Force in damdawi lam mithiamte nen an sawiho dawn tih a sawi bawk a ni.

Health & Family Welfare Board Vice-Chairman Dr. Z.R. Thiamsanga pawhin Kohhran leh NGO hrang hrang ten sawrkar ngenna leh hmalakna te tha taka an thlawp thin avangin lawmthu a sawi a, kohhran aw chu mipuiin an ngai pawimawh a ni tih a sawi bawk.

Chief Secretary Pu Lalnunmawia Chuaungo pawhin International Border kan neih zingah Zokhawthar chauh inkalpawhna atan hawn a ni tih a sawi a. Screening pawh uluk taka neih a nih thu a sawi bawk. Mizoram mamawh chakkhai lakna kalkawng zingah Bairabi leh Vairengte hawn a nih thu leh screening neih zel a nih thu a sawi a. Online Inner Line Permit (ILP) tih tawp rih a ni a, District Deputy Commissioner Office-a ILP diltu te chu DC ten uluk taka an ngaihtuah hnuah loh theihloh thilah chauh an pe ang, tih a sawi bawk a ni.

He inkawmnaah hian kohhran chanchinbu kartin chhuakah Novel Coronavirus (COVID-19) laka inven nana tih tur leh tih loh tur awareness chhuah ni se tiin rel a ni a. Inneihna leh Lungphun leh program danga kalkhawm tlem zawk an awm theihnan inkaihhruaina mumal tak MKHC hian a ruahhman dawn a ni.

MKHC aiawha kal te hi Mizoram Synod, Baptist Church of Mizoram, Roman Catholic, United Penticostal Church (NEI), Seventh Day Adventist, Zomi Baptist Church, Methodist Church, Salvation Army etc atangin an ni.