No.3345/2021-2022

Aizawl, 10th December, 2021 : November ni 18, 2021-a North-East MSME Conclave, Guwahati-neih a nih tuma Pu Narayan Rane, Union Minister for MSME nen thurawn a pek bawhzuiin Dr R. Lalthangliana Commerce & Industries Minister chuan hripui lengin Mizorama micro enterprises enkawltu harsatna tawk chhungkaw 50000 khaichhuahna tur “Proposal for Special Economic Package” chungchangah sawrkar laipuia mi pawimawhte nimin khan mi engemawzat a hmu a, Pu Narayane hi a pisa ah a tlawh bakah he proposal tih hlawhtlinna tura mi pawimawh chi hrang hrangte a hmu bawk a, hemi bakah hian a department enkawlte mamawh chi hrang hrang umzui bawkin vawiin hian a chhunzawm leh dawn a ni.

Dr R. Lalthangliana hian Union Minister for MSME bakah, DoNER Minister G. Kishan Reddy leh Union Finance Secretary Dr TV Somanathan te chu an pisa ah tlawh vekin Mizoram-a Industry te dinhmun leh Covid-19 hripui vanga Industrial unit-ten harsatna an tawh hrang hrang te a sawipui a. Hripui leng vanga eizawnna tlachhiate chhanchhuahna tur Central Sorkar atanga tanpuina pek an nih loh chuan Industrial Unit tam tak chu hnathawk chhunzawm thei lo va khar mai hmabak an ni tih sawiin, Micro Enterprise te chhanchhuahna tur “Proposal for Special Economic Package” sawrkar laipuia an thehluh tawh chu tih hlawhtlin sak ngei tura ngenin, Mizorama industrial unit zinga 97.36% chu micro enterprises te an nih thu sawiin, an dinhmun a that chuan Mizoram economy pawh nasa takin a mumal theih phah dawn a ni, a ti a. MSME guidelines nen inmil lo deuh pawh nise a pawimawhzia an hriat sak a tul a ni, a ti a. Sawrkar laipuia Minister leh thuneitute pawimawh dang a hmuhte chuan Dr. Thangtea hi tha taka lo dawngsawngin, proposal chu uluk taka an lo zirchian tur thu leh a hlawhtlin theihnan theihtawp chhuaha hmalakpui an tum thu an lo hrilh a ni.

Union Ayush Minister Sarbananda Sonowal pawh a pisaah tlawhin Dr. Thangtea chuan Mizora hmun hrang hranga AYUSH Hospital sakna tur atana DPR an thehluh tawh chungchang a sawipui a, Union Minister hian a lo bawhzui sak tur thu sawiin, AYUSH Hospital dang din belh leh zel a nih theih dan turte an sawi dun bawk a ni.

Dr Thangtea hian Dr.VK Paul, NITI Aayog member (Health) chu a pisa ah hmu bawkin Civil Hospital, Aizawl leh damdawi in dangte tihchangtlunna tur atana a ngenna a tihhlawhtlin sak thin avangin lawmthu a hrilh a, Civil Hospital, Aizawl-a dah tur Magnetic Resonance Imaging (MRI) an mamawhna a thlen chungchangah Dr. VK Paul chuan Boeing Company in an tihsak theih dawn thu a lo hrilh a, Boeing India Pvt. Ltd. Chief of Staff Pi Praveena Yagnambhat chu ko nghalin hemi chungchang hi an sawiho zui a, Boeing Company chuan thla 6 chhungin tihfel vek theih an inbeisei thu Pi Praveena hian a sawi a ni.

Dr R. Lalthangliana hian New Delhi-a Canada High Commission (Embassy) pawh tlawhin an hotu pawimawh tak takte nen inkawmhona hun tha tak an hmang a, Mizorama COVID-19 hripui leng mek dinhmun an sawiho bakah Commerce & Industries sector-a Canada in Mizoram a puih theihna tur awm te sawihovin, anni pawhin kumthar tir lamah Mizoram rawn tlawh an tum thu an sawi nghe nghe a ni.

Attachment

  • Loading attachment...