No.3364/2021-2022 

Aizawl, 11^th December, 2021 : Mizoram hmasawnna tur kawng dapa Delhi-a cham mek Dr R. Lalthangliana, Minister, Commerce & Industries, Health & Family Welfare, Higher & Technical Education chuan vawiin khan sawrkar laipuia Ministry hrang hranga thuneitute a dawr chhunzawm.

Vawiin chawhma khan Dr. R. Lalthangliana hian MSME Secretary BB Swain chu a pisa ah hmuin MSME Secretary bakah Joint Secretary leh official pawimawh ten lo dawngsawngin Dr Thangtea chuan lama MSME Minister Narayan Rane leh Union Finance Secretary Dr TV Somanathan te nen a inkawmna bawhzuia kal a nih thu a hrilh a, COVID-19 hripui vanga harsatna tawk Mizorama Micro Enterprise te chhanchhuahna tur “Proposal for Special Economic Package” pawimawhzia hrilhfiahin nodal Ministry an nih ang ngei a lo ngai thutak tur leh a hlawhtlinna tura tan lakpui turin a chah a, MSME Secretary leh a thawhpuite chuan Minister thahnemngaihna chu a fakawm an tih thu sawiin, theihtawp an chhuah tur thu an lo hrilh a ni.

“Proposal for Special Economic Package” bakah hian Industrial Growth Centre, Luangmual, Aizawl-a mi chu a ruhrel leh thil pawimawh dang tihphuisui a pawimawh thu thlen bawkin, MSME hnuaia SFURTI scheme thar hmanga Mizoram hmun thenkhata hmalak nghal a tul thu a thlen bakah Union MSME  Minister in kumthar January thla a Mizoram tlawh a tum chungchangte an sawiho bawk a ni.

Minister hian Rajesh Bhusan, Secretary, Ministry of Health & Family Welfare chu tlawh chhunzawmin Mizoramin COVID-19 hripui dona kawnga hma a lakna a sawipui bakah National Health Mission, Mizoram tan a kum 2021-2022 chhunga hman tur tangka cheng vaibelchhe 140 lai mai ruahman sa an rawn sanction muang lutuk chu a ngaimawh hle tih sawi bawkin, Mizoram sawrkarin a tih ve  ngai awmte nen enzuiin hmanhmawh lehzuala hmalak a nih tur thu an sawi a ni. Heng bakah hian COVID-19 hri kai damlote mamawh damdawi man to leh vang Tocilizumab leh Remdesivir chungchang pawh a sawipui a, UNION Health Secretary hian Mizoramin a mamawh zat an thlen chuan a lo tihfel nghal tur thu a lo hrilh a, Zoram Medical College tihchangtlunna tura hmalak dan tur chi hrang hrang an sawi dun bawk a ni.

Dr Thangtea hian Ministry of Tribal Affairs Secretary Anil Kumar Jha pawh a pisa ah hmuin Mizorama Tribal Industries Complex dinna tur chungchang leh Health Sub-Centre te thuam thatna atana hmalakna tur bakah College zirlaite awmna tur Tribal Hostel sak chungchangte bakah Ministry of Tribal Affairs kaltlanga hmalak theih thil pawimawh chi hrang hrang an sawi dun bawk a ni.

Ministry of Human Resources Development official pawimawh mi pathumin Minister Dr R. Lalthangliana hi a thlenna Mizoram House, Chanakyapuri ah rawn panin thil pawimawh tak tak an sawipui a, Minister hian RUSA hnuaia Asst. Professor te hlawh chungchanga harsatna chinfel a harsa lutuk chu a ngaimawh hle tih lo sawiin anni chuan reiloteah chinfel theih an inbeisei tawh thu an hrilh a, Minister-in RUSA 3.0 chhunzawm thuai a tul thu a sawi pawh thla 3 hnu ah chuan kalpui hman an inbeisei tih an hrilh bawk a ni.

HRD officials te hnenah hian Dr Thangtea chuan kum kalta January thla a Ministry of HRD in Mizoram University, Southern Campus, Lungleia din phalna notification a tihchuah tawh COVID-19 hripui leng vanga hmalak chak theih loh chungchang pawh lo sawiin anni chuan a tul anga theihtawp chhuaha an lo bawhzui nghal tur thu an lo hrilh a ni.

Dr Thangtea hian vawiin vek hian ICMR Director General Prof Balram Bhargava pawh a pisa ah tlawhin tunhnaia “The Week” Magazine in “Man of the Year” a an thlang chu lawmpuina a hlan a, Ministry of Road Transport & Highways offialte pawh tlawhin Mizoram chhim lama an hmalakna chak tawk lo leh muang lutuk a ngaimawh thu leh Mizoram tana a pawimawhna hrilhin chak lehzuala hma la turin a hrilh a ni.

Dr R. Lalthangliana hian zanin khan Indian Parliament-a training nei mek I&PR officialte leh MJA member te pualin Mizoram House, Chanakyapuri ah zanriah a buatsaih bawk a ni.

Minister in sawrkar laipui a dawrna ah hian Pi Florence Zotluangpuii, Director, Commerce & Industries, Pu C. Lalrinmawia, CDO, Commerce & Industries leh Pu Vanlaltlana Zote, PS to Minister ten an tawiawm a ni.

Dr R. Lalthangliana hian Union Minister for MSME bakah, DoNER Minister G. Kishan Reddy leh Union Finance Secretary Dr TV Somanathan te chu an pisa ah tlawh vekin Mizoram-a Industry te dinhmun leh Covid-19 hripui vanga Industrial unit-ten harsatna an tawh hrang hrang te a sawipui a. Hripui leng vanga eizawnna tlachhiate chhanchhuahna tur Central Sorkar atanga tanpuina pek an nih loh chuan Industrial Unit tam tak chu hnathawk chhunzawm thei lo va khar mai hmabak an ni tih sawiin, Micro Enterprise te chhanchhuahna tur “Proposal for Special Economic Package” sawrkar laipuia an thehluh tawh chu tih hlawhtlin sak ngei tura ngenin, Mizorama industrial unit zinga 97.36% chu micro enterprises te an nih thu sawiin, an dinhmun a that chuan Mizoram economy pawh nasa takin a mumal theih phah dawn a ni, a ti a. MSME guidelines nen inmil lo deuh pawh nise a pawimawhzia an hriat sak a tul a ni, a ti a. Sawrkar laipuia Minister leh thuneitute pawimawh dang a hmuhte chuan Dr. Thangtea hi tha taka lo dawngsawngin, proposal chu uluk taka an lo zirchian tur thu leh a hlawhtlin theihnan theihtawp chhuaha hmalakpui an tum thu an lo hrilh a ni.