3262/2022-2023

Aizawl 14th January 2023: Social Welfare Minister Er.Lalrinawma chuan Sesawng Branch YMA Golden Jubilee lawmna chu Sesawng Comminity Hall-a buatsaih chu khuallian niin a hmanpui a, Jubilee Lungphun leh Jubilee Building thar a hawng nghal bawk.

Minister Er.Lalrinawma chuan thusawiin YMA Golden Jubilee hial lawm thei Sesawng YMA Branch dintute leh hruaitu ni tawh leh ni mek te chu fakawm tiin kalkhawm te chu  Jubilee chibai a buk a. YMA chu pawl tangkai tak, tanpui ngaite tanpuitu leh kan khawtlang a chhiat ni leh that ni ah kan belh ber, Mizo nunze mawi leh hnam ziarang chawi nungtu an ni a ti.YMA member-te chu mahni hnam nunphung leh ziarang te zahpui lo a chawinung zel turin a sawm nawn a, hnam dang nupui pasal neih chungchangah YMA member kan nihna angin thlan thiam a pawimawh a, Ram leh hnam humhalh kawngah theihtawp chhuah zel tura sawmin, fa neih tam chungchang pawh inzirtir thar leh a tul a tih thu Minister Er.Lalrinawma chuan a sawi.

YMA Member te chu ruihtheih thil lakah fihlim tur leh, mahni awmhmuh theuhah ruihtheih thil do  zel tura fuihin Social Welfare Minister chuan nun uluk loh hian kan hmalam hun thui tak a tichhe thei tih hre thar tur leh kan ram leh hnamin leirem a rah theih nan ram tana nunna chan ta te hrerengin ram leh hnam himna leh enkawlnaah mi tinin mawh kan phur theuh a ni, a ti bawk.

Khuallian hian Golden Jubilee lungphun hawnna leh YMA Golden jubilee Building hawnna hun a nei nghal bawk a ni.

Pu K.Vanzama, President Zawlbuk Group YMA pawhin Jubilee thuchah leh members te fuihna thu sawi a, hemi puala Souvenir siam chu  Pu Ramherliana, Sesawng Branch YMA hruaitu hluiin a tlangzarh a ni.

Jubilee lawmna hun hi Pu Lalramchuana Ralte President in kaihruaiin Upa Lallawmkima'n hun serh a hmang a. Pu C.Lalremruata VC-I VCP hnen atanga thusawi ngaihthlak niin, Sesawng Branch YMA hruaitu lo ni tawh te chawimawina hlan an ni a. Pu PS Thanga, Asst Sect Sesawng Branch in lawmthu sawiin hun a khar a ni.