Consultative Committee for Excise & Narcotics Department chu vawiin khan Excise Minister Pu J H Rothuama hovin a Pisa-ah an thukhawm a. He thutkhawmna a hian Member Pu P P Thawla leh Pu T T Zothansanga MLA te an tel a; Member dang pahnih - Pu Selthuama leh Pu Joseph Lalhimpuia te chu an zin chhuah avangin leh Member pakhat - Brig. Thenphunga Sailo chu hrisel lohna avangin an tel thei lo a. Anni bakah he meeting ah hian Commissioner of Excise & Narcotics leh Excise Department hotute an tel a ni. 
Consultative Committee thukhawm chuan Winery, Excise Department Motor dinhmun, Study Group of MLTP Act leh Excise Department hnuaia post ruak hnawhkhah chhungchang te an sawiho a. Committee chuan Zawlaidi hmingthlakna leh  Zawlaidi in a zu pai (alcohol content) ennawn chu Sawrkar ah thlen nise a ti a. Mimal hnena Sawrkarin Winery din phalna a pek chu grape chingtute hmakhua thilrin Committee chuan tha a ti a. Kum 2010 khan grape 9000 qtls.  vel tharchhuah a nih laiin, 2000 quintal vel chauh Champhai leh Hnahlan Winery ah te wine siam nan hman a ni.

Committee chuan Excise Department motor thenkhat hlui tawh lutuk te chu tih ral a, a thar a thlak  an rel bawk a. Excise Minister chuan Sawrkarin MLTP Act zirchiang tura a din 'Study Group on MLTP Act' in hma an lak dan te Committee chu a hrilh a; rel erawh a la awm loh thu a sawi.