Vawiin khan Environment & Forests Minister Pu H. Rohluna hovin Environment & Forests Department hnuaia Senior officers te, Asst. Conservator of Forests (ACF) te leh Range Officers te chuan an Department Conference Hall-ah meeting an nei a, PCCF leh Principal Secretary E & F ni bawk Pu S.S. Garbyal’n meeting hi a kaihruai a ni.

Forest Officer te fuihna thu tawite a sawi a Minister chuan hetianga thahnemngaihna thil a inrawnkhawmna hun huaihawt a ni chu a lawmawm hle a ni a ti a. Balu lung leh forest tharchhuah lak kawngah te hian Forest Reserve huamchhunga mi chu Department mawhphurna liau liau a ni a. A bak erawh chu Geology & Mining emaw Department dang emaw, mimal emaw mawhphurhna a nih thu hi mipui mimir in tun ai hian hre chiang se a duhthu a sawi a ni.

Meeting chuan Department in tun Sorkar kum chhunga an hnathawh dan thlir lailawkna neiin hna la hmabak te chak zawka thawh dan an sawiho a. Forest Management hnuaia – Reserve Forest Area chhunga balu leh lung lak dan, Mau leh Hmunphiah chungchangte chu meeting ah hian zau taka sawiho a ni a. Phalna nei lova thing zai thin, Ram vak thin leh Nauban la thin te an la awm chu ngaimawhin, heng thil tih ching thin hi tun aia khauh zawk khuahkhirh nise an ti a.

Meeting-ah hian Department in sorkar sum bawm a sum tam zawk an chhunluh theih nan rawtna hrang hrang an siam a. Mizoram Forest Act 1955 siamthat leh Indian Forest Act 1927 kenkawh dan tur te pawh sawiho a ni.