No.1815/2021-2022 

Aizawl, 12th August, 2021 : Vawiin chawhnu khan Health Minister Dr. R. Lalthangliana hovin SAD Conference Hall, MINECO-ah Health Department hotuten COVID-19 hrileng dona kawnga hma an lak dan an thlirho a, Health Secretary Pu R. Lalramnghaka bakah Health Department hotu pawimawhte an tel a ni.

Vawiin meetingah hian COVID-19 hripui leng dona atana mamawh hmanrua leh damdawi dinhmun a that thu tarlan a ni a, Rapid Antigen Test kit pawh tuna hman dan anga chhutin kar hnih daih a la awm thu leh nuai 3 dang lei belh leh tum a nih thu tarlan niin, Viral transport Medium (VTM) thla 5 daih a la awm thu sawi a ni a. ICMR-in RT-PCR test kit 20,000 a thlawna an rawn pek chu nikum lama siam a nih vangin a hlui deuh tawh a, a hman theih loh vangin Health Minister hmalaknain ICMR ah hriattir a ni a, an rawn thleng leh dawn tih sawi a ni. RNA extraction kit 20,000 Delhi atang a rawn thlen leh dawn thu leh Guwahati atang 1000 a rawn kal mek thu sawi niin, reiloteah mumal takin RT-PCR test kalpui leh theih beisei a nih thu tarlan a ni. PPE kit pawh Commerce & Industries hmalakna zarah phang lova an awm thu sawi a ni a, mamawh dang mask chi hrang hrang, sanitiser, sodium hypochloride leh thildangte pawh thlaphanawm a nih loh thu tarlan a ni bawk.

ZMC-ah COVID-19 vanga nunna chan April thlaah mi 4, may thlaah mi 24, June thlaah mi 50, July thlaah mi 42 leh August thlaah ni 12 chawhma lam thlengin mi 16 an awm tawh a, ZMC pawn lamah nunna chan an awm nual tawh bawk a ni. ZMC-a hmasawnna hna thawh mekte pawh theihtawp chhuaha hmalak zel a nih thu tarlan a ni a, thawktute zingah positive an awm leh thin avang leh quarantine ngai an awm leh thin avangin duh anga chakin a thawh theih loh a, CPWD in oxygen plant 1000LPM an siam mek chu August ni 15 a peihfel tum a nih laiin loh theih lohna thilm avangin August ni 30 ah zawhfel an inbeisei tih sawi a ni a, hmanraw mamawhte Guwahati atanga rawn thawn tura tih tunhnai ramri boruak vanga tangkhang pawh tunah hian rawn thawn chhuak tura buatsaih mek a ni, an ti.

ZMC-a khum 25 awmna NICU,  kum 10 awmna PICU leh khum 10 awmna tho HDU te chu an peohfel thawkhat tawh a, oxygen outlet siam la ngaiin phai lam atangin technician te an rawn kal thuai dawn tih tarlan a ni a. LG Electronics in oxygen pipeline an tum dawn tih tarlan a ni bawk. Aizawl Civil Hospital-a COVID-19 hri kai, negative tawh, ventilator la mamawh chhunzawmte dahna tur ICU khum 10 awmna chu peihfel tep a nih thu tarlan a ni a. COVID-19 hri kai negative tawhte zinga mi thenkhat chu COVID-19 hrikin an chuap a lo tihchhiat nasat tawh thin avangin enkawl zui an ngai thin tih sawi a ni.

ZMC-a damlo enkawltute zingah COVID-19 positive an awm leh thin avangin an indaihlo zual hle tih tarlan a ni a, tunah hian mi 24 lai positive an awm a ni. ZMC inventilator an dawn tam takchu a bun (install) tur engineer te an rawn la kal theih loh vangin a hman theih loh a, ventilator hman laite an rim em em avangin a chhe ve thin a, indaih lohna a awm loh nan engineer te lo kal thuai tura nawr dan tur sawiho a ni.

Khum 40 awmna Kulikawn Hospital DCHC pawh luah tgheih tura peihfel tawh niin, damlo admit theih a nih tawh thu meetingah hian tarlan a  ni a, Mualpuia MSSC Hostel, DCHC atana hman tur pawh reiloteah peihfel a nih dawn thu tarlan a ni.