Rural Development hnuaia scheme hrang hrang Mahatma Gandhi Rural Employment Guarantee Scheme, Pradhan Mantri Awaas Yojana (Gramin), Border Area Devlopment Programme (BADP), Mizoram State Rural Livelihood Mission, Social Audit Unit (SAU) leh Mission Antyodaya a Mid-term Review meeting chu vawiin khan Rural Development Minister Pu Lalruatkima kaihhruaiin Aijal Club-ah neih a ni.

Minister Pu Lalruatkima chuan Project Director leh Block Development Officer-te chu mi rethei dawm kan nan leh ram hmasawn nana thawktu an nih inhria a mahni bial hre chiang tur leh thahnemngai lehzuala thawk turin a fuih a. Scheme kalpui a nih danah fel leh dik taka kalpui a ni em tih uluk taka enzui a vil turin a chah a ni.

Meeting-ah hian District leh block hrang hrang ten thingtlang tihhmasawnna tur scheme hrang hrang an kalpui dan thlirho a ni a. Hmasawn an ngaihna lai te sawi hovin sawrkar laipuiah Mid-term Review meeting hmachhawn leh a ngaih dawn avangin hun tiam chhunga hnathawh tur bituk te tha taka hlen chhuak tur leh an thlen chin atanga hmasawn theuh a tul zia in hrilhhriat a ni.

Mizorama khaw tin dinhmun hriat chianna turin Mission Antyodaya survey neih a ni dawn a. Hemi chungchang hi vawiin meeting-ah hian sawi lan niin he survey hi hmang tangkai a, sawrkarin scheme tha tak tak a siamte hlawk zawka hman a nih theih nan thawktuten an tangkaipui ngei beisei a ni.

RD scheme kalpui tha District leh block hrang hrangte hnenah award hlanna hun hman a ni a. MNREGA hnuaia tehfung hrang hrangah District bikah chuan Aizawl an ti tha bera, a dawtah Serchhip niin pathumna chu Kolasib an ni a, block-ah chuan Thingsulthliah pakhatna niin Phullen in a dawt a, pathumna chu Darlawn an ni. PMAY (G) ah Serchhip District pakhatna niin pahnihna Aizawl, pathumna Kolasib leh Champhai an ni. Block-ah chuan East Lungdar pakhatna an ni a, pahnihna Serchhip niin Thingsulthliah pathumna an ni.