No.1913/2020-2021

Vawiin Dt. 11.06.2020 khan Taxation Minister Pu Lalchamliana hovin Taxation Department Officer ten COVID-19 hripui leng mekin Sorkar sum dinhmun a nghawng dan thlir hovin, tax revenue collection tipung tura hmalak dan tur an sawi ho.

Covid-19 hripui a len avanga lockdown in kan ram ei leh bar leh sumdawnna a nghawng dan sawiho a ni a. Mizoram Sorkar-in tax (chhiah) a hmuhna tam ber chu chhiah lakna bungrua hralhna atanga sumdawngten Goods and Services Tax (GST) an chhunluh hi a ni a. Lockdown avangin March thla tawp lam atanga vawiin thlenga mumal taka sumdawnna kalpui theih a nih loh avangin April 2020 thlaah phei chuan (tax) chhiah hi Rs. 1435.16 Lakhs (Vbc 14.35) chiah a lut a. Taxation Minister kaihhruaina hnuaiah Taxation Department chuan Lockdown chhung khan theihtawp a chhuah a. May 2020 chhunga tax (chhiah) lutzat chu Rs. 4608.75 Lakhs (Vbc 46.08) ah a pungchhova. Tun Sorkar Kumthar 2020-21 chhunga tax (chhiah) lut tawh zat chu 6043.91 Lakhs (Vbc 60.44) lai a ni tawh a ni.

Minister Pu Lalchamliana chuan, "Hripuiin min tibuai hle chung pawh a Taxation Department-a thawktute inpekna nasa tak avanga hmasawnna kan hmu hi a lawmawm tak meuh a. Tax pek pawimawhna mipuiten kan lo hre telh telh a, Sawrkar Department dangte pawhin min hriatpui chho zel hi a lawmawm ka ti tak meuh meuh a. Chhiah pek hi Kohhran inrelbawl dan nen a inang deuh a; Kohhran member-te thawhlawm tel lo chuan Kohhran a kal thei bik lo ang hian khua leh tui ten chhiah pek kawnga kan harh ang zelin ramin hmasawnna a hmu thin. District Council hunlaia chawmhlawm rilru put ang chi kha kan kalsan ta hi hmasawnna tha tak a ni” a ti.

Taxation Department officer-te hian kan hun tawn harsa tak karah ruahmanna tha tak siam a, revenue dinhmun siamthat kawnga Minister in a Department a enkawl dan chu a lawmawm an tih thu an sawi a. Tax chhunluh kawngah sumdawngte leh contractor te thahnemngaihnaah an lawmthu an sawi bawk. Kan ram dinhmun chhe lutuk tur veng turin sawrkara chhiah kan chhunluh kawngah mipuite pawh thahnemngaia theihtawpa thawhpui turin an sawm bawk a ni.

Taxation Department hi Mizoram Sorkar tana sum la lut hnem bertu niin, 2018-19 khan State’s Own Tax Revenue pumpui Rs. 72669.97 Lakhs (Vbc 726.69) atanga Rs. Rs. 57888.30 Lakhs (Vbc 578.88) hi Taxation Department thawhchhuah a ni. State’s Own Tax Revenue a Department thawhchhuah chu 79.65% tihna a ni. Kum 2019-20 ah pheichuanSorkar-in Target Rs. 52179.06 Lakhs (Vbc 521.79) a tuk chu Rs. 14819.66 Lakhs (Vbc 148.19) laia khumin Rs. 66728.72 Lakhs (Vbc 667.28) an khawn a ni.

Taxation Minister hi naktuk June Ni 12 hian Mizoram aiawhin GST Council Meeting-ah Video Conferencing hmangin a tel ang ang.