All India Radio Aizawl chuan an din champhaphak vawi 50-na (Golden Jubilee) lawmna chikhat atan tukin khan Walkathon an buatsaih a, Information & Public Relations (I&PR) Minister Pu Lal Thanzara’n a vailiam a ni.

All India Radio Aizawl in kum 50 a tling ta chu lawmpuiin I&PR Minister chuan radio kaltlanga mipui rawngbawlna hna an thawh chu ram leh hnam tan malsawmna a ni, a ti. Aizawl Station puitling awm hma, Gauhati leh Shillong atanga Mizo programme an tihchhuah hunlaite thlir letin Pu Lal Thanzara chuan khaw khata mi neinungte chauh neih phak radio-a Mizo programme changa thenawm khawveng an punkhawm laih laih thin hunlai te ngaihtuahin a lunglenthlak hle a ni, a ti a, kum heti zat bahlah lo leh hmasawn zawnga programme an kal tir thei zel chu a lawmawm hle a ni, a ti. Minister chuan AIR Aizawl kum 50 tlin lawmna puala cancer veite tanpuina tur ruahmanna an siam chu fakin sum leh pai thawhtu mi thahnemngaite hnenah lawmthu a sawi bawk a ni.

Walkathon hi zing dar 6:30-ah All India Radio, Aizawl Station Tuikhuahtlang atanga tanin Millenium Centre tualzawl ah an tawp a. Kharna programme tawi buatsaihin cancer veite puala sum thawhkhawm cheng 1,70,830 chu Mizoram State Cancer Institute (MSCI) Director Dr. Thangchungnunga hnenah Minister Pu Lal Thanzara’n a hlan a ni.

Golden Jubilee ni tak, July ni 31 hi Pathianni a nih avangin a lawmna pui ber chu Inrinni July ni 30 chawhnu dar 1-ah Vanapa Hall-ah neih a ni dawn a. Mizoram Chief Minister, Pu Lal Thanhawla chu khuallian a ni ang. All India Radio, Aizawl-ah hian tun dinhmunah thawktu 77 leh Casual eng emawzat an awm mek a. Ni tin mipuite tan programme Primary Channel leh F.M. Zoawi-ah darkar 22 an puang chhuak a ni.