Vawiin chawhma khan Mizoram Florists Association-te buatsaih Chapchar Kut Flower Fair & Show 2016 chu Assembly Annex-ah Art & Culture Minister Pu R. Romawia’n a hawng.

Pu R. Romawia chuan Mizo fate kut ropui ber, Chapchar Kut chu Mizo hnam zia rang pholang thei zawnga uar taka lawm turin Mizo mipuite a sawm a. Chapchar Kut Organizing Committee pawhin sawrkar department hrang hrang te chu hetiang zawnga hma la turin a lo ngen tawh thu tarlangin, Mizoram Florists Association-ten Chapchar Kut puala Chapchar Kut Flower Fair & Show an buatsaih thei chu fakawm a tih thu a sawi bawk. Pangpar khawitute chu ramdang atanga pangpar lakluhte bakah Mizorama tualto pangparte mipuiten an hlut zual zawk nan tan la tura sawmin Chapchar Kut chu hlim leh lawm taka hmang turin duhsakna a hlan nghal a ni.

He inkhawm tawi hi Mizoram Florists Association President Pi Lalnuntluangi’n a kaihruai a. Mipuiten fair an hlut thin avanga pangpar khawituten sum thahnem tak an la lut thin chu lawmawm a tih thu sawiin, Chapchar Kut Flower Fair & Show 2016 pawh tlawh theuh turin mipuite a sawm bawk. Mizoram Florists Association General Secretary Pi Liansangpuii chuan Chapchar Kut Flower Fair & Show 2016 atana an inbuatsaih dan report a pe a, he Fair-ah hian Mizoram Florists Association member-ten an mahni chin leh tharchhuah ngei pangpar chi hrang hrang, dawr 49-ah an phochhuah thu a tarlang bawk.

Chapchar Kut Flower Fair & Show hi Art & Culture Department bultumin, Horticulture Department leh Mizoram Florists Association tawngkawpin an buatsaih a ni a. He Fair-ah hian seasonal leh perennial pangpar chi hrang hrang (potted flower) hmangin inelna neih a ni. March ni 4 thleng, zing dar 9 atanga tlai dar 5 chhungin a duh apiang tan pangpar a lei theih dawn a ni.

Mizoram Florists Association hian an din tirh atangin flower show hi vawi 40 lai an buatsaih tawh a ni.