No.7086/2020-2021

Pu C. Lalrinsanga, Minister, Irrigation & Water Resources (I&WRD), Agriculture, Cooperation, etc chuan Serchhip kiang Mat lui kama Mualvawm zauva thlai chawm nana lei hnuai tui enchhinna anga verhchhuah thar a tlawh a, he lai hmun veka NABARD suma kalpui tur Chawmzau Ground Water Project thawhna tur hmun te a fang nghal bawk.

Hemi puala heng lai vela loneitute nena inkhawmkhawmna, Farmer Training Hall a buatsaihah Minister chuan,  hun kal taa Irrigation Department in tuikawng a lo siam tawh tam takte chu la hman tlak mah se tuihna lo kam zel avangin tuilak tur zawkte a lo vang tial tial a. Khawvel sik leh sa inthlakin min nghawng chho ve zel niin a lang a. Chu harsatna sutkina nana hmalakna pawimawh chu leihnuai tui thlai chawm nana verhchhuah hi a ni a. Lei hnuai tui siak chhuah hna hi Mat phaia thlai chingtute tan lian tham takin kalpui a ni dawn a ni, a ti a. Vawiina an verh chhuah hi chu a enchhinna ang deuh mai a la nih thu a sawi. Pu C. Lalrinsanga chuan, kan rama kan tharchhuah ve theih reng thlai kan la chaw lut nasa hle tih sawiin heng te hi keimahni ngeiin kan tharchhuah a, loneitute sum leh pai lakluh nasa zawka tihpun chhoh zel chu sawrkar thiltum lian tak a nih thu sawiin, thlai chi hrisel intodelhna tura hma laknate, thlai thar dahthatna lama hma laknate a tarlang a. Kan intodelh theih nan loneitute theihtawp chhuaha an tan sauh sauh a tul hle tih a sawi bawk. Minister hian Mizoramah PMKSY hmanga Ground Water Irrigation Project 13, Rs. 1604.89 lakhs senna tur leh ram hactare 553 chawmna tur kalpui a nih tur thute, Mat Phai zau bik tan pawh NABARD sum Rs. 227.15 lakhs senga hmun 31 a tui verh chhuah an tum thu te a tarlang bawk a ni.

Er. H. Lalzirliana, MLA, Vice Chairman, Road & Infrastructure Development Board pawhin thusawiin, thlai tharchhuahna lama Mizoramin hma a sawn theih nana Irrigation & Water Resources Minister thahnemngaihna leh inpekna chu ropui a tih thu a sawi a. Mat Phaia loneitute taihmakna leh thawhrimna te chu hmuhnawm a tih thu leh an tana Ground Water irrigation hmalakna awm tur chu a lawmpui thu sawiin, a taka an hman theih hunah tangkai taka hmang ngei turin duhsakna a hlan a ni.

He hunah hian Er. Lalrotluanga, CE, I&WRD chuan technical report a pe a. Vawiina lei hnuai tui an verhchhuah, Minister in a tlawh sak chu leihnuai tui verhna khawl kum 2019 a pahnih an lei thar enchhinna leh a ram neitu Pu R. Lalramliana huana hman atan ni bawk sia an verh a nih thu a sawi a. Vawi thum an verhnaah feet 90 a thuk verhin feet 70 thlenga thukah a bang an zu siam thei a. Feet 50 velah tui pump-na khawl lang thei (submersible pump) zu thun lutin chumi hmang chuan tui thianghlim tha tak an pump chhuak ta a ni.  A tlangpuia chawhrualin tui hi minute khatah litre 20 a pump chhuah theih a ni. An verhna khawl hi New Holland Company in 4 by 4 Tractor a vauh theih tura a bika a siam niin, Air compressor a bika siam nena inthlunzawm tura duan a ni a. Meter 100, feet 330 thlenga thuk a verh thei a ni. A khawl enkawltu tur hi a hranpa taka training pek an nih thu a tarlang bawk. Er. Lalrotluanga chuan, Mat phaia thlai chingtute hman tur hetiang tui verh hi hmun 31 ah siam an tum thu leh chumi thawhna tur chu NABARD sum Rs. 227.15 lakhs an hmuh tawh thute, Expenditure Sanction nghah mek a nih thute a tarlang a,  chhungkaw 34, ram hactare 52 a zauva thlai chingtuten fur leh thlasik thlai an chinnaa an hman tangkai tur a nih thu pawh a tarlang a ni.

Inkawm hona hi Pi Sangchhin Chinzah, MCS, Secretary, I&WRD, etc in a kaihruaia, lei verhna khawl hmanga lei an verh lai video thlir hona neih a ni. Inkawm hona neih zawh hian Minister hian Chawm Zau leh a chhehvel zau hrang hrangte a fangkual a ni.