Planning Minister Pu Lalsawta chuan vawiin tlai khan Economics & Statistics Directorate Office, Khatla a tlawh a, department hotute nen inkawmna hun hmangin an hmalakna leh hnathawh dan hrang hrangte an sawiho. Department dinhmun leh hnathawh dan te sawipuiin Minister chuan Mizoram tana department hrang hrangin statistical data an buatsaih inanglo chi hrang hrang awm thin chu tibova, Mizoram pum tana statistics pakhat rintlak buatsaih a ngaihpawimawh thu hrilhin chutiang atana Economics & Statistics Department chu inbuatsaih turin a chah. Economics & Statistics Department hian hna hrang hrang - National Sample Survey, Registration of Births & Deaths, Consumer Price Index, Agriculture Census, Meteorological Data, State and District Domestic Product, Census of Government Employees, Hospital Statistics, Statistical Handbook leh Statistical Abstract te a thawk thin a, heng bakah hian Government of India-in survey tura a rawn tuk - Basic Statistics for Local Level Development, Building Statistics, Employment & Unemployment Statistics, Economic Census te a buaipui thin bawk a ni. India Sawrkarin India Statistical Strengthening Project a kalpui mek hmangin Mizoram Economics & Statistics Department pawh thuam changtlun chhoh mek a ni a, Directorate leh District Office building te sak nan tunah hian hmalak chhoh mek a ni bawk a ni.

Minister hi Parliamentary Secretary Pu K.S.Thanga leh Planning & Programme Implementation Secretary Dr C.Vanlalramsanga, IES ten an tawiawm a, department hotu te chuan an harsatna leh mamawh te Minister hnenah hian lo thlenin department hmasawnna turte an sawiho bawk a ni.