Vawiin khan Forests Officer te puala buatsaih ‘Rehabilitation of Jhumlands through Agroforestry Practices’ Training chu Environment &Forests Department Conference Hall, Tuikhuahtlangah E&F Minister Pu H. Rohluna’n a hawng.

Minister chuan Mizo ten kum tam tak kalta atanga kan lo chin tawh thingtlang lo neih (Jhum Cultivation) tun thlenga ram mipui tam zawkin eizawnna bulpui bera kan la hman fo chuan nasa taka kan ram sik leh sa, lei thatna, thing leh mau te a tihchhiat thu tarlangin chumi do letna tur chuan sorkarin NLUP a ruahman thu a sawi a.  Agriculture leh Forestry thiamna kai kawpa thing leh mau tichhe chuang lova mipuite eizawnna tur thlai chin dan zirna Agroforestry chu NLUP nen pawh a inhmeh hle a ni, a ti.  India ram State dang Punjab, Haryana, Uttar Pradesh leh Uttaranchal-ah te Agroforestry thiamna hlawhtling taka an lo kalpui tawh ang bawkin Mizoramah pawh he thiamna hian danglamna a thlen ve ngei a beisei thu Minister chuan a sawi a, hlawk taka Training an neih theih nan kalkhawmte duhsakna a hlan a ni.

Hawnna inkhawma thusawitu dang Principal Chief Conservator of Forests Pu SS Garbyal pawhin Mizoram chu Industry leh Factory lian ten a tihbawlhhlawh ve loh boruak thianghlim neitu, India ram puma ngaw nei zau ber a ni a, lo vah leh hal avang erawh chuan chak takin ram ngaw chhah tha a kiam zel a, a thlakna tur zawn hmuh a tul takzet a ni, a ti a. Vawiin Training a Officer leh Scientists rual kalkhawmte chuan chin dan tha zawk, ngaihtuahna thar an phawrh chhuah ngei a beisei thu a sawi a ni.

Training hi Indian Council of Agricultural Research (ICAR), Mizoram Centre, Kolasib te buatsaih niin ICAR, Barapani, Meghalaya leh ICAR Kolasib atangin Scientist engemawzat an tel a ni.