No.3778/2021-2022

Aizawl, the 24th January, 2022: Tukin khan Social Welfare Department Minister Dr. K. Beichhua chuan National Girl Child Day pualin short film tlangzarhna a nei a, hemi ni denchhen hian thingphunna hun a quarter-ah a hmang bawk a ni.

Minister chuan kum 2008 atangin National Girl Chid Day hi January ni 24 ah kumtin hman thin a ni a, tunkum ah pawh covid hripui karah sawm bik ten an hmang thei chu lawmawm a ti a, hun chep tak kara a buatsaih tu Women & Child Development Department hotute chungah lawmthu a sawi a. Minister chuan National Girl Child Day hi hmeichhe naupang harsatna tawk te tanpui leh dawmkanna bakah hmeichhe naupang humhalh leh an dikna chanvo an neih theihna tura India ramin hma a lakna leh hriselna an neih nana chaw tha pek leh zirna an neih theih nana hmalakna te denchhena ni pual bik a ni a ti a. Ministry of Women & Child Development in he ni hi a ngai pawimawh em em avangin keini state ah pawh vawiin ni hi hmeichhhe naupangten hriselna tha tak nei a an lo puitling chho a, ram chhungah United Nations bakah NITI Aayog pawhin a ngaih pawimawh em em 'gender equality' kan ramah kan neih chho theihnana vawiin ni program hi siam a ni a ti a. Khawtlang leh ram changkang-ah hmeichhe dinhmun a hniam ngailo a, hmeichhe dinhmun a sanna ah piangah ramin hma a sawn chak thin tih hre reng in kan society ah pawh zirtur tam tak kan nei a ni a ti a. Kan ramah hian hmeichhe dinhmun politics ah hniam mah se thil dang dangah mipa aiin hmeichhe activity a tam zawk a, chungah chuan mipa te in en let a tul hle a ni, tiin a sawi.

Tukin a Short film tlangzarh 'Importance of Education for Girl Child' hi Rinkson Squad Production siam a ni a, Department of Women & Child Development te bultum niin, YouTube channels bakah Zonet, LPS ah te remchan hmasa ah mipui atam thei ang berin an thlir theih tura chhuah a ni dawn a ni.

National Girl Child Day pual hian kum tina department in alo tih dan angin Aizawl Civil Hospital a hmeichhe naupiang lawmpuina thilpek leh certificate hlanna hun hman a ni ang a. Naupang huaisen chawimawina hlanna programe, Central Sawrkar in a buatsaih pawh vawiin chhun hian webinar kal tlangin department hotuten an chhim dawn bawk a ni.