Health Minister Pu Lal Thanzara chuan vawiin chhun khan Rs 6,29,700 /- senga sak MHIP Building chu Lungdai ah a hawng.

MHIP Building hawnna inkhawm ah thu sawiin Minister chuan Mizo te chuan Chanchin Tha zar kan zo nasa hle a, NGO pawl tha tak tak kan neih phah a ni, a ti. Heng NGO pawl te hian mahni hmasial taka hma la lovin hnam leh khawtlang tan theihtawp chhuahin hma an la thin a, ram pumin kan chhawr tangkai hle a, Mizo nun tizangkhaitu a ni, a ti. Mizoram Sawrkar hmalakna hrang hrang te tarlangin Pu Lal Thanzara chuan Sawrkarin a din Law Commission chuan Mizo hmeichhia te dinhmun a zirchian atangin Mizo hmeichhia te rahbeha an awmna atanga chawikan nan Mizo Inneih, Inthen leh Rokhawm Dan, 2014 chu a pawm tak thu te a sawi lang a. Khawtlang inrelbawlna ah hmeichhia ten chanvo tam zawk an neih theih nan ruahmanna siam a nih tak thu te, ei leh bar zawnna kawnga kuthnathawktu te chhawmdawl nan leh chawikan nana NLUP chak taka kalpui mek atang te chuan mi taima te chuan dinchhuah phah nana an hman mek thu te a tarlang bawk. Hriselna kawngah sum harsatna avanga mamawh ang thawktu inlak a remchan loh chung pawha thawktute inpekna leh thahnemngaihna azarah tha taka kalpui mek a nih dan te, motor kawngpui chungchangah state dangte nena khaikhin chuan Mizoram kawngpui te chu a that zawk thu te leh kawlphetha lamah pawh state chhung atanga siamchhuah la tlem hle mah se state dangte nena teh chuan power supply nei tha pawl tak kan nih thu te a sawi lang a, mipui te chu sawrkar hnathawh leh hmalak dan te chik taka thlir thin turin a chah bawk.

Lungdai MHIP Building hawnna inkhawm hi Lungdai YMA Hall ah hman a ni a, Pu Lalzara Colney, Vice President, Lungdai Village Council-in a kaihruai a, Lungdai Branch MHIP Secretary Pi Vanlalchhungi’n in sak dan report a pe bawk. MHIP Building hi feet 20 vel bialin a chhawnga sak a ni a, bialtu MLA te, sawrkar department, khawtlang hruaitute leh mipui te tanpuina leh thawhhona atanga sak a ni. Lungdai MHIP Building hawnna programme hi khawtlang hruaitu leh tlawmngai pawl hrang hrang hruaitu ten an hmanpui bawk a ni.

Minister hian Lungdai Primary Health Centre a tlawh bawk a, damdawiin room hrang hrang te fangkualin thawktu te nen mamawh leh harsatna tawh te leh hmalak dan tur te an sawiho bawk a ni.