Vawiin chawhma dar 9:30 khan Minister of State Pu Lalruatkima chuan New Secretariat, Khatla-ah a pisa thar a luah tan a. Dampa Bialtu MLA Pu Lalrintluanga Sailo chuan a tawiawm a ni.

AMC Councillor Pu R. Thanglura chuan programme hi kaihruaiin kalkhawmte lawmna thu a sawi a. Dawrpui Vengthar Bialtu Pastor R. Lallianpara chuan hunserh a hmang a ni.

Minister Pu Lalruatkima chuan kum tam tak suangtuah thin a taka a thleng ta chu lawmawm a tih thu a sawi a. Rorelna dik leh hleih nei lo mipuiten kan mamawh a ni tiin huaisen leh dik taka rorel pawimawhna a sawi a. Mipui huapzo thei ang bera hnathawh a tum thu a tarlang a. Sawrkar Department pawimawh tak tak a chang chu lawmawm tiin thawhhona tha tak an neih ngei a beisei thu a sawi a ni.

Pu Lalruatkima hian Rural Development Department, Land Revenue & Settlement Department leh Information & Public Relations Department a chang a. Programme-ah hian heng department hotute leh officer-te leh a chhungten an telpui a ni.