No.6653/2020-2021

Aizawl, the 24th November 2020 : Vawiin khan Land Revenue & Settlement Minister Pu Lalruatkima leh Law & Judicial and Parliamentary Affairs Minister leh Champhai South bialtu MLA ni bawk Pu TJ Lalnuntluanga te hovin Revenue Minister Pisa ah Agriculture leh Land Revenue & Settlement Department ten Champhai Town Area huam chhunga leilet humhalh chungchang hma lakna kal mek an sawiho a, kal zel dan tur an rel a ni.

Meeting ah hian Pu Lalruatkima chuan Sawrkarin leilet a siam theih ram potential area hi a ngaipawimawh a, Agriculture Department ten hemi kawngah nasa takin hma la in tan an la a, Rural Development Department pawhin hei hi tul tiin ni 100 inhlawh kaltlangin buh leh bal tharchhuah tihpun theih nan contour terracing te siam anih thu a sawi a. Champhai Town Area chhunga leilet WRC ram hi settlement atana hman anih chuan Mizoram buh leh bal tharchhuah a nghawng thei a chuvangin helai hmun hi dan ang thlapa humhalh tha a tih thu a sawi a. Chutih rualin WRC area hi enfel a tul thu leh helai ram hman dan chungchangah Sawrkar hriattirna (notification) thar chhuah a tul thu te pawh meeting ah a sawi lang a ni.

Pu TJ Lalnuntluanga pawhin hmasawnna kal zelah leilet siam te hi hlawk lo mahse intodelhna atan leh tharchhuah tihpun kawngah a pawimawh em avangin humhalh a tul mai bakah siam belh zel pawh Sawrkar ngaihpawimawh a nih thu te a sawi a. Tunah Champhai Town Area huam chhunga leilet te hman dan mek dan enchian a, chumi dungzuia dan ennawn tur a awm chuan siam that a, chu dan chu tha tak a kenkawh tha a tih thu te a sawi tel bawk.

Meeting ah hian hemi chungchang zirchiang tura ruat Task Force te thil hmuh dan leh an thlen chin chu Task Force Chairman Chairman, Agriculture (Crop Husbandry) Director Pu Rohmingthanga Colney meeting ah a report a. Town area chhunga leilet Department record-a hectare 730 anga chinchhiah chu teh that leh mek (demarcate) a nih thu te, leilet rama kudam leh permanent structure te chu a bik takin Zotlang, Zote, Tlangsam Road leh Tuipui hnar lam ramah te a tam thu a report a. Meeting chuan Champhai DC in he thilah hma lakna a neih tawh te pawh an sawiho a ni.

Meeting ah hian Champhai mai bakah North Vanlaiphai leh South Vanlaiphai ah te pawh hetianga hma lakna nei tha an tih thu an sawi a. Champhai Town area huam chhunga Leilet ram te hi Champhai Master Plan te nen pawha en mil a tul thu pawh meeting a sawilan a ni.

Task Force Report tun thla ni 27 ah a luh fel hnuah Department pahnih ten he thil hi ennawn a, chumi dungzuaia a tul anih chuan ram hman dan inkhuahkhirhna chungchangah hriattirna chhuah thar leh an rel a ni.  

Meeting ah hian Commissioner & Secretary Agriculture Pu Lalhmingthanga; Secretary, LR&S Pu R. Zarzosanga;  Agriculture (Crop Husbandry) Director Pu Rohmingthanga Colney; Director, LR&S Pi Angela Zothanpuii te bakah Department 2 officer dangte an tel a ni.