Vawiin khan Home Minister Pu R. Lalzirliana chuan Chawnpui a Tawngtai Bethel Camping Centre-a hmeichhe camper-te awmna tur in sak mek chu a tlawh. Home Minister hi Disaster Management & Rehabilitation Minister Pu C. Ngunlianchunga leh Palrliamentary Secretary Lt. Col. (Rtd.) Z.S. Zuala ten tawiawm in, Police leh Excise & Narcotics Department hotute bakah Central YMA hruaitute an tel bawk a ni. He building sak hi kumin August thla a Police leh Excise Department leh CYMA ten ruihhlo do tura thawhhona an siam rah chhuak a ni.

Home Minister chuan kan ramah sualna a pung chho zel a, ruihhlo leh zu ngawlvei an tam telh telh bawk a; Police, Excise leh CYMA te chuan ruihhlo do beihpui an thlak naah ngawlvei te enkawl dam chu thil pawimawh tak ani tih an hriat tel avangin enkawlna tur hmun an ngaihtuah hnu in, Tawngtai Bethel Camping Centre chuan inhawng taka thawhpui rem an lo ti chu a lawmawm hle a ni, a ti a. Ngawlveite enkawl dam hi he hmalakna hlawhtlinna tur pawimawh tak pakhat anih angin, Tawngtai Bethel Camping Centre thawktute tlawmngaihna chu fakawm tiin, Sorkarah beisei nei miahlo a Pathian rinchhana ram thatna atan an hmalakna chu entawntlak a tih thu Pu R. Lazirliana hian a sawi a ni.

DM&R Minister Pu C. Ngunlianchunga pawhin thu sawiin, mihring enkawl hi khawvel a thil harsa ber zing ami a ni a, thawktu tlemte in camper tam tak an enkawl chho chu thil ropui tak a ni tiin, camping centre thawktute hmalakna chu chhuanawm a tih thu a sawi.

Building sak hna hi September thla tawp khan tan niin, feet 40×24 a zau, chhawng hnih luah tura ruahman a ni a. Home Minister hian a tul anga hman turin Rs. 50,000 a hlan a, DM&R Minister hian building sak tanpuina atan tarpauline bag 5 bakah pawisafai Rs.50,000 a pe bawk a ni.