1498/2026-2027 

Dated Aizawl, the 23rd July, 2026: Vawiin khan Social Welfare, Women & Child Development Department leh SELCO Foundation ten Anganwadi Centre (AWC) 300-te service pekna leh an infrastructure tih chakna turin MoU (Memorandum of Understanding) an ziak. He MoU ziahna hi Social Welfare, Women and Child Development Minister Pi Lalrinpuii chuan khuallian niin hun a hmanpui. He inremna hi SWW&CD Commissioner & Secretary Pi Lalzarmawii leh SELCO Foundation Senior Project Manager Pu Lalnuntluanga ten an ziak a ni.

Minister Pi Lalrinpuii chuan thu sawiin, naupangte chu an lo ṭhanlen nan leh an hmasawnna turin hmun him, mi zawng zawng tel theihna leh an mamawh phuhru thei environment an neih theihna tur chu Mizoram sawrkar chuan a ngaihpawimawh hle thu a sawi a. SELCO Foundation nena an thawhhona hian Anganwadi Centre-te chu sustainable energy hmangin a tichak dawn a ni, a ti. He hunah hian CDPO leh CO lo kalte chu fuihin, field visit nei tam tur leh inelna thianghlim nei nasa turin a chah bawk a ni. 

Minister chuan he hmalakna hian infrastructure leh service delivery pawh a tihchangtlun zawk a beisei thu sawiin, he thawhhona hi Mizoram pumpui chhunga hmeichhia leh naupangte mamawh phuhru zawk thei tur leh community institution-te chak zawka siam tumna kawnga hmalakna pawimawh tak a nih thu sawiin, SELCO Foundation nen thawhhona ṭha an nei thei chu lawmawm a tih hle thu a sawi bawk. 

Hun kaihruaitu SWW&CD Commissioner & Secretary Pi Lalzarmawii chuan Mizoram Anganwadi Centre 300 lai solarisation kalpui a nih tur chu lawmawm a tih thu a sawi a. Solar power pawimawhzia sawiin, vawiina MoU ziah a ni thei chu lawmawm a tih thu a sawi bawk. He thawhhona hi hun lo kal zel turah ṭangkai leh entawntlak tak a nih a beisei thu a sawi a ni. 

WCD Director Pi Zoramthangi Chhangte chuan thu sawiin, district leh block officer te chu Anganwadi Centre thawktute hmalak dan enpui turin a chah a, ṭan lak a ṭul thu a sawi bawk. AWC 300 solarisation neih theih a ni tur chu chhuanawm a tih thu a sawi bawk. 

He hunah hian SELCO Foundation Project Manager Pu Lalṭanpuia chuan thu a sawi a. Decentralised Renewable Energy (DRE) solution leh infrastructure development support hmangin Anganwadi Centre-te chu hmun tha zawk, hman tlak zawk leh energy hman dan tha zawk an nih theihna turin thawhhona kalpui tur a ni, a ti a. December 2026-ah he solarisation hi zawh tum a nih thu a sawi a bawk. Mizoram pumpui huam zawka hmeichhia leh naupangte hriselna, nutrition leh zirnate tha zawk a lo thlen theihna turin hma lak tum a ni, a ti. 

Kum hnih chhung kalpui tur, he thawhhona hian khawtlang leh vengchhung a hmeichhia leh naupangte tan early childhood development, nutrition leh health service-te tihchangtlun a tum a. Hmun hla leh service pekna remchang tawk lo hmunte pawh huamin, community-te mamawh phuhru ṭhin heng centre-te hi an kaihhruaina tih chak tum a ni bawk.

Programme hi rei tak kalpui theihna turin local capability tihchak hi ngaih pawimawh a ni a. Anganwadi Worker (AWW)-te, Anganwadi Helper (AWH)-te leh sawrkar official-te chu system dahte thawh dan leh enkawl dan chungchangah training pek an ni ang. Last-mile level-a model tha tak takte tihlan leh zir chhuah theihna turin Saksham Anganwadi Centre 10 chu tihchangtlun niin, demonstration centre-te angin hman an ni ang. 

He MoU ziahna hunah hian WCD aṭangin offical te, District lama official CO leh CDPO te pawh an tel a ni. He hun hi WCD Joint Director Pi Sailopari in lawmthu sawiin a khar a ni.